Gjev ikkje opp skulekjøp

Sandven har funne ei rekkje argument for å kjøpa Kvam vidaregåande skule, og listar dei opp i ein interpellasjon. H føreslår på bakgrunn av argumenta å senda rådmannen i ny dialog med fylkeskommunen om kjøp eller leige av skulen. Målet er å kunna nytta bygget som mellombelse undervisingslokale for barneskuleelevane når Øystese skule skal oppgraderast.

H vil ha saka klar til september. Dersom det skulle enda med kjøp og ikkje leige, vil H seinare ha ei politisk sak om eventuelt vidaresal av eigedomen.

Partiet ynskjer at rådmannen skal avklara kor lenge fylkeskommunen treng bygget, og finna ut om det vil påverka når oppgraderinga av skulen kan ta til. Ein må unngå å seinka eller lengja byggjeperioden, ifylgje framlegget i interpellasjonen.

Når det gjeld trafikkavvikling ved dei mellombelse lokala, meiner Sandven at berre born i 1. og 2. klasse kan sleppast av ved skulen. Resten kan gå av ved til dømes Øystesehallen for å redusera trafikken på Rossvoll.

Må flytta bilane?

H føreslår at delar av parkeringsplassen, atriet og parkeringsplassen for tohjulingar på Rossvoll skal nyttast til leikeareal. I tillegg vil partiet vurdera å ta i bruk den asfalterte ballbanen ved ungdomsskulen, som i dag vert nytta som parkeringsplass av tilsette. Dei kan i staden parkera ved Øystesehallen, ifylgje partiet.

Rådmannen opplyste i mai at planen er å nytta 36-bygget ved Øystese skule og brakker nær Øystesehallen til undervising når Øystese skule skal rustast opp. Elevar og tilsette vert med andre ord spreidde i byggjeperioden.

Sandven meiner det vil vera eit gode å samla alle på same stad, i eigna lokale som er tilpassa til undervising og som har nok plass til alle. Han understrekar at elevane med skule på Rossvoll ikkje treng å kryssa nokon fylkesveg på veg til eller frå skulen. Ein slepp undervising i bygg nær anleggsområdet, miljøavtrykket vert mindre enn med ein brakkeskule, og drifta av anlegget vert meir effektiv om entreprenøren har tilgang til heile området, trur Sandven. Han påpeikar elles at heradet kan tena på å selja skulen att, medan brakkeskulen ikkje vil tilføra heradet meirverdi.

Håpar på handsaming

Interpellasjonen kjem på bordet i heradsstyremøtet 20. juni. Så seint som 23. mai tok Bjarte Helland (INP) til orde for ny dialog om kjøp med fylkeskommunen. Framlegget kom i kjølvatnet av at rådmannen hadde takka nei til tilbodet om kjøp fordi dei kommunale leiarane ikkje såg nokon trong for eigedomen. Det hende utan at prisen var drøfta, men ein takst på 16,5 millionar kroner var utgangspunktet.

Det politiske reglementet seier at ordføraren kan avvisa eit «forslag om å ta opp igjen ei sak som er lovleg vedteke av heradsstyret, når forslaget vert fremja før det har gått 3 månader etter at vedtaket vart gjort».

Sandven meiner at saka ikkje kan avvisast med bakgrunn i denne føringa, av di framlegget etter hans syn skil seg vesentleg frå det som vart røysta over i mai. Han viser til at framlegget frå INP berre galdt kjøp av bygg, utan spesifisert bruk og utan at politikarane på førehand visste om planane om brakkeskule – og dimed om behovet for tilpassa, mellombelse skulelokale som kan redusera kostnadene.

Interpellasjonar kan verta stoppa utan realitetshandsaming dersom ein tredel av heradsstyret motset seg dei. Sandven viser til at det har vore engasjement rundt saka, og vonar at H vil få høve til å argumentera for saka.

Ordførar Torgeir Næss (Ap) opplyser at han ikkje har bestemt seg for om han vil avvisa saka med bakgrunn i det politiske reglementet. Han har tidlegare sagt at han normalt sett ikkje vil avvisa interpellasjonar.