Gjester rann inn og pengar ut
Skianlegga på Kvamskogen gler seg over gode besøkstal i romjola, men høge straumprisar legg ein dempar på gleda.
For fyrste gong sidan 2018 har både Furedalen Alpin og Eikedalen Skisenter halde ope i jola, og mange har teke turen innom dei to skianlegga. Men sjølv om besøkstala har vore gode, er dei daglege leiarane uroa.
– Straumrekninga for desember vert høg. Eg gruar meg til å opna henne når den tid kjem, seier dagleg leiar i Eikedalen Skisenter AS, Fredrik Tønjum, til BA.
Sikra ny straumavtale
Til BA fortel Tønjum at straumprisane har vore på kring 7 kroner per kilowattime på det høgaste i desember. Ifylgje han er det produksjonen av kunstsnø som har ført til at rekninga vert høg. Trass dei høge prisane var det ikkje aktuelt ikkje å produsera snø.
– Me var berre nøydde til å laga snø. Eg klarte ikkje å lata vera. Det har redda fyrste del av sesongen, seier Tønjum til BA.
Kunstsnøen og snøfallet før jol førte til at senteret kunne opna, og samanlikna med 2021 har besøkstalet vore mangedobla i 2022, fortel Tønjum.
Heilt mørkt er det ikkje for skisenteret i Eikedalen. Ifylgje den daglege leiaren har senteret sikra ein ny straumavtale i januar som vil dekkja delar av utgiftene.
– Vert dyrt
Dagleg leiar i Furedalen Alpin, Jan Guttorm Skeie, fortel til BA at han er svært nøgd med besøkstala den siste veka, men at også han ventar ei høg rekning i januar.
– Det blei ikkje så dyrt som me frykta, men på spørsmålet om det var dyrt, så er svaret ja. Rekninga vert nok på hundrevis av tusen, seier Skeie.
