Gjer vatn meir tilgjengeleg for rørslehemma
Øystese Jeger- og Fiskarlag har oppdatert nabovarselet om å setja opp eit grindbygg og ei reiskapsbu ved Blekeld i Fitjadalen.
Nabovarselet som vart sendt ut 1. september, inneheldt ikkje ein naudsynt dispensasjonssøknad. Det gjer det nye.
Øystese Jeger- og Fiskarlag ynskjer òg å gjera grunnarbeid og leggja ut førehandsstøypte betongelement for kombinert turpadleanlegg og slipp.
Det vil gje auka moglegheiter for funksjonshemma til å koma seg ut og fiska, ved at det vert laga ei universell utforming for å få rullestolar ut i båt. Det er òg naudsynt å leggja ut grus for eit båtopptrekk og plassera mellombelse parkbord i området.
Søkjaren ber Kvam herad om dispensasjon frå landbruks-, natur- og friluftsområdet, omsynssyna ved drikkevatn og omsynssona for ras, flaum og busetnad langs Fitjadalsvatnet. Dispensasjonssøknaden gjeld òg for bruk og vern av sjø og vassdrag med tilhøyrande strandsone.
Hovudargumentasjonen for tiltaket er at det vil gje området og funksjonen auka samfunnsmessig verdi, utan å vera til hinder for eller minska høvet til landbruk eller gardstilknytt næringsverksemd, skriv laget.
Tryggleikskrava er evaluerte, og utforming og dimensjonering stettar intensjonen i byggtekniske forskrifter, ifylgje søknaden.
Jeger- og fiskarlaget leiger området ved Blekeld av Kvam herad, og fekk lengd avtalen med 30 år frå 2020. Laget nyttar området som base for fiskekultiveringsarbeidet i Fitjadalsvatnet. Anlegget er til ålmenn bruk. Området har frå før eit grindbygg og toalett.
