Gjer mellombels leiarstilling til permanent jobb

I om lag eitt år frå 1. mars 2023 var Reidun Braut Kjosås konstituert leiar av kommunehelsetenesta, opplyser HR-sjef i Kvam, Kari Sagen. Kjosås er tilsett som folkehelsekoordinator, men har fått permisjon frå stillinga.

Sagen fortel at rådmannen har bestemt seg for at den mellombelse stillinga skal verta permanent. Tidlegare hadde helse- og omsorgssjefen sjølv ansvar for legetenesta. Det slepp altså dagens sjef, Terje Langeland.

– Det viser seg at det er mykje jobb. Spesielt etter Norheimsund legesenter vart kommunalt, vart det mykje ekstra arbeid med legetenesta, seier Sagen.

– Vil ha fast løn

I ein periode då Kjosås var i stillinga, hadde ho ansvar for alle kommunehelsetenestene. I tillegg til legetenesta og Kvam legevakt hadde ho ansvar for ergo- og fysioterapitenesta og rus og psykisk helse. Men heradet gjekk vekk frå dette etter ei evaluering undervegs, og dei to sistnemde oppgåvene gjekk attende til helse- og omsorgssjefen.

Sagen fortel at det er jobben med å rekruttera og skaffa fastlegar som krev meir ressursar. Tidlegare var dei fleste legane sjølvstendig næringsdrivande. Om ein lege slutta, selde legen ofte bedrifta vidare, og skaffa såleis arvtakaren sin sjølv, ifylgje Sagen.

– No vil dei fleste unge legane ha fast løn, og då må heradet tilsetja dei, seier Sagen.

– Meir administrativt

Leiing av legetenesta inkluderer Norheimsund legesenter med legar og helsesekretærar, og ansvar for fastlegar, legevakta og det som elles ligg til den kommunale legetenesta, seier Sagen.

Ho fortel at det no vert kravd at legar må ha fem års spesialisering i allmennmedisin for å verta fastlege, og at kommunane har ansvar for å fylgja opp dette. Det betyr meir administrativt arbeid, ifylgje Sagen.

Éin mann og seks kvinner ynskjer å leia legetenesta, ifylgje den offentlege søkjarlista. Ingunn Kråkevik, Elisabeth Regine Vestbø, Katrine Ingvartsen, Anders Teigen, Sissel Aase Børve og Jorunn Selsvik er dei namngjevne søkjarane. Den siste kvinna har fått høve til ikkje å få namnet sitt offentleggjord.

Eit slikt unntak frå hovudregelen om innsyn namna på søkjarane føreset at det er til vesentleg ulempe for søkjarane at namna deira vert kjende. HF har bede om innsyn i den komplette søkjarlista.