Gjennomslag for Legeforeininga
Legeforeininga bad nyleg alle fastlegar om å halda att føreskrivinga av blå reseptar.
Det skulle vera ein reaksjon mot gebyret legar kunne få dersom Helfo meinte at reseptar vart utgjevne ulovleg. Streiken råka òg pasientar i Ullensvang, heiter det på heimesida til kommunen.
No har Legeforeininga fått gjennomslag for at det ikkje vil verta skrive ut bøter til legar etter den nye gebyrordninga.
— Me oppmodar difor legane om å ta opp att alminneleg føreskriving av blå resept, seier president i foreininga, Anne-Karin Rime, i ein artikkel på legeforeningen.no.
— Me er no trygge på at den omstridde gebyrordninga vil verta teken opp til ny vurdering. Me har brei politisk støtte for synet vårt, seier Rime.
Den nye ordninga vart innført for at folketrygda ikkje skulle verta påført unødvendige utgifter. Trygda dekkjer heile eller delar av kostnaden for pasientar når dei hentar ut medisinar på blå resept, ifylgje NRK.
Blåreseptordninga kosta staten 10,1 milliardar kroner i løpet av 2015, ifylgje ein rapport frå Riksrevisjonen, skriv statskanalen på nrk.no.
Helfo forvaltar årleg om lag 35 milliardar kroner. Dette omfattar oppgjer frå folketrygda til behandlarar, leverandørar og tenesteytarar og individuell refusjon av utgifter for privatpersonar til mellom anna legemiddel, ifylgje helfo.no.
