– Gjenbruk er eit felles ansvar

Både i Kvam og i Jondal gjer frivillige ein innsats for å vareta miljø og hjelpa menneske ved å ta imot og selja bruktvarer. Overskotet, både pengar og gjenstandar, går til forskjellige prosjekt og velgjerande føremål.

– Eit felles ansvar

– Den største gleda ein kan ha, er å gjera andre glad, seier Molina Mo, som er innehavar av bruktbutikken Lokalen – «alles butikk».

Butikken i Norheimsund har altså som mål å vera ein butikk «for alle» – ein stad der folk kan koma for å gje, handla eller arbeida. Inntektene støttar ulike velgjerdsprosjekt, spesielt retta mot det å få menneske ut av fattigdom.

Ifølgje Facebook-sida til Lokalen er chime.no, eit frøprosjekt i Uganda, mellom organisasjonane som får støtte. I tillegg går inntekta til prosjekt som plantar tre, byggjer brønnar i Kongo, leverer skulesekkar til Romania og Aust-Europa, og til Misjonsalliansen, som gjev geiter til fattige i Vietnam.

Bedrifta har tru på at det mogleg å påverka bedrifter og menneske til å kjøpa og å leva meir lokalt, seier Mo.

– Me vil at pengane me får inn, skal gå til planting av frukt, tre og bærbuskar, og me vil satsa meir på lokale tiltak.

Mo er oppteken av folk og helsa deira. Lokalen drøymer om å bidra til å gjera folk friskare og gladare, seier ho. Det kan gjera til dømes ved å leggja til rette for at dei kan eta sunnare mat og lokal mat utan tilsetjingsstoff, ifølgje Mo.

Butikken er avhengig av at frivillige bidreg for at Lokalen skal halda fram med å vera «alles butikk», seier Mo.

– Gjenbruk er eit felles ansvar. Me samarbeider, slik at det vert meir av dette.

I haust utvida butikken med eit nytt lokale. No er det plass til eit større utval av gjenstandar, noko som kan føra til fleire kundar, vonar innehavaren av Lokalen.

Hjelp til å skapa levebrød

Også Plant eit tre i Øystese, som fylte 15 år i november, er oppteken av miljø og gjenbruk. Namnet skal symbolisera føremålet med han, som er å vera ein miljømedviten arena, forklarar Liv Skutlaberg, som er frivillig i butikken.

Butikken støttar prosjekt som lærer folk å driva små planteskular, som hjelper trengande med sjølvhjelp ved å planta tre og grønsaker, og som gjev dei høve til å skapa eit levebrød ut av det. Gjennom støtta til mikroplanteskular og skogplantingsprosjekt bidreg ein til å redusera høge temperaturar ved å planta skog, ifylgje Skutlaberg.

Plant eit tre har som årleg tradisjon at overskotsvarer som klede, leiker og sko vert sorterte og sende til Latvia. Skutlaberg fortel at gåvene vert tekne imot med stor takksemd. Arbeidet er til glede for både dei som får hjelp og dei som gjev hjelp, fortel ho.

– Eg synest det er kjempemoro. Det er veldig mange kjekke folk og flinke medarbeidarar, og det er ein utruleg god fellesskap.

Butikken driv ikkje berre med sal av brukte gjenstandar. Ifølgje Skutlaberg har ei gruppe drive med redesign. Delar av det som vert laga, vert stilt ut i butikken.

Tilbake til folket

På den andre sida av fjorden, nærare bestemt i Jondal, ligg Jondal Frivilligsentral, ein av 514 slike sentralar i landet. Sentralen styrer drifta av bruktbutikken i det gamle posthuset i Jondal.

Han skulle etter planen opna i 2020, men stod fyrst klar i 2021. Planane vart endra på grunn av pandemien, fortel dagleg leiar Christine Fauskanger Molven i frivilligsentralen. Før dette var butikken ein såkalla «gratisbutikk», der folk kunne levera inn ting og stikka innom om dei trong noko.

I Jondal går overskota tilbake til folket, fortel Molven. Frivilligsentralen arrangerer mellom anna seniormiddagar, turar, spikkekveld og gjenbrukskafé. Dei som jobbar der, er frivillige som melder seg til teneste når det passar.

I tillegg til at det vert arrangert diverse aktivitetar, har overskotet gått til å kjøpa hageutstyr til sjukeheimen i Jondal, og til byselskapet innan rus og psykisk helse, fortel Molven.

Journalistane er mediefagselevar ved Framnes Kristne Vidaregåande Skule. Artikkelen er skriven som ein del av undervisinga. Red.