Gjekk seg skorfaste i Kvanndalen
To utanlandske menn gjekk seg fast i fjellet i Øystese langfredag. Eit redningshelikopter og ei alpin redningsgruppe fekk dei trygt ned.
Hovudredningssentralen i Sør-Noreg opplyste på Twitter klokka 15.51 at eit redningshelikopter frå Florø og Hordaland Alpine Redningsgruppe var kopla inn i aksjonen. Mennene, som ikkje er norske, var lokaliserte i eit juv i Kvanndalen, eit bratt dalføre nord for Botnane.
Klokka 16.20 var ein redningsmann heisa ned til turistane, og vona var å få dei ut med helikopteret, opplyste Bergens Tidende etter å ha snakka med redningsleiar Johan Mannsåker ved Hovudredningssentralen. Sentralen opplyste til HF klokka 16.39 at ein var i ferd med å førebu seg til å heisa mennene opp.
Klokka 16.56 opplyste sentralen om at dei to mennene var henta ut. Dei ville verta overlatne til lokale redningsressursar, ifylgje twittermeldinga.
Her reiser redningshelikopteret frå Fitjadalen etter aksjonen:
Politiet fekk melding om vanskane til mennene klokka 13.38. Politiet kom til Fitjadalen, og frivillige i Raudekrossen vart kalla ut, opplyste Vest politidistrikt på Twitter klokka 14.32.
