Gjekk seg fast i fjellet
Ove Brynestad og kona Gudny Hauknes fekk ein dramatisk fjelltur laurdag.
I området nedanfor Såta i Ålvik, vart dei sitjande fast i ei fjellhylle og måtte ringa etter hjelp.
– Eg har gått turen fleire gonger tidlegare, men denne gongen hadde eg med meg Gudny. Ho tykte det vart for bratt og tøft, og me kom oss korkje opp eller ned, fortel Brynestad.
Dermed måtte eit helikopter frå redningshelikoptertenesta 330 skvadron rykkja ut og henta dei.
– Det heile var litt pinleg, men det er fantastisk at me har nokon som kjem og reddar oss når me får problem. Folka i helikopteret var veldig dyktige og profesjonelle, seier Brynestad.
Brynestad og Hauknes melde frå om at dei var i naud om lag klokka 12.30. Dei var trygt nede på bakken om lag tre timar seinare.
Brynestad er frå Ålvik, men han og Hauknes bur i Asker. Dei ferierer for tida i Ålvik.
