Går vidare med gondolprosjekt
Odda kan få ein gondolbane frå sentrum til Rossnos, men skepsisen er stor allereie før saka er greidd ut.
Medan næringsrådet i Kvam nøyer seg med ei zipline, ligg det føre tankar om endå større tiltak lenger inne i Hardangerfjorden.Onsdag vedtok kommunestyret mot åtte røyster å inngå ein intensjonsavtale med Norwegian Experience AS, som har teke initiativ til Skylift-prosjektet. Hadde ikkje det skjedd, hadde sistnemnde selskap avslutta arbeidet med prosjektet.Medan Kåre Grønsnes (SV) og Tiril Eiken (Sp) meiner eit slikt prosjekt vil vera i strid med posisjonen som Noregs friluftshovudstad, som kommunen har tildelt seg sjølv, er andre rykande usamde.
– Som strykejarn
Fleirtalet la vekt på trongen for tiltak som kan skapa nye arbeidsplassar, og viste til ymse dystre statistikkar.– Barnetalet dett som eit strykejarn frå Trolltunga, sa Gard Folkvord (Ap).Han drog linene godt over hundre år tilbake i tid og minte om kor stolte oddingane er over dei massive naturinngrepa som i si tid vart gjort som del av vasskraftutbygginga og la grunnlaget for eit industrisamfunn og liv i fjordbygdene.– Me bur her og trivst her fordi me har utnytta naturen. Det må me halda fram med for å skapa vekst, sa han.Planen er at gondolen skal gå frå Skalltaket, ein del av det nedlagde smelteverket i sentrum, til fjellmassivet 1.407 meter over havet, søraust for Odda sentrum.Tiril Eiken meiner det korke er friluftsliv eller meistring å koma seg til fjells med ein gondolbane. Andre meiner det er viktig å leggja til rette for at alle kan koma seg til fjells, og framheva at Ullensvang har rikeleg med fjellområde som folk kan nyta i total fred og ro.
Ikkje utgifter enno
Positive og negative sider ved banen skal vurderast i ei eiga konsekvensutgreiing. Intensjonsavtalen inneber i seg sjølv ikkje økonomiske plikter for kommunen, i motsetnad til det fleire hevda i ordskiftet, men legg opp til at det seinare skal stiftast eit selskap som kommunen skal eiga ein tredel av. Eventuelle kostnader vil koma fyrst i samband med aksjonæravtalen. Denne vil koma til politisk handsaming. Fleire av skeptikarane uttrykkte otte for kommunal deltaking i eit aksjeselskap.Intensjonsavtalen skal vera grunnlag for å sikra finansiering og for eit forprosjekt. Bygginga kan truleg byrja tidlegast i 2024.– Ullensvang kommune får no ein unik sjanse til å gjera ei grundig vurdering av om kommunen vil vera med på denne spanande utviklinga i reiselivet, skriv rådmann Ole-Jørgen Jondahl i saksutgreiinga.
– For dårleg opplyst
Hildegunn Espe (Sp) kritiserte saksutgreiinga. Ho meiner særleg dei økonomiske følgjene av vedtaket er for dårleg opplyste av rådmannen. Espe meiner saka burde vore del av kommuneplanen og vore sett i ein meir heilskapleg samanheng. Ho trur at til dømes gode skulefritidsordningar er eit viktigare grunnlag for vekst enn ein gondolbane.Sistnemnde utspel fekk ordførar Roald Aga Haug (Ap) til å reagera. Folketalet i Ullensvang herad har ikkje auka med fleksible SFO-ordningar, påpeika han. Andre nytta høvet til å påpeika at heller ikkje Loen, som fekk gondolbane for noke år sidan, så langt har fått auke i folketalet som følgje av tiltaket.Amund Velure (Ap) påpeika at kommunestyret i denne omgangen ikkje skulle seia ja eller nei til banen, berre til vidare utgreiing.Medeigar og styrelem Rune Glasø i Norwegian Experience fekk høve av ordførar Roald Aga Haug (Ap) til å orientera kommunestyret om saka i dagens møte. Kåre Grønsnes er kritisk til at selskapet fekk ordet i det same møtet som saka vart avgjord. Andre påpeika at meir informasjon om saka har vore etterlyst, og at orienteringa såleis var turvande.
