Går over til ny teleleverandør
Ikkje alle nummer går over i historia, men nokre «kjære» kjem nok til å forsvinna når Kvam herad går frå Telenor til Telia–Phonero.
Kvam herad har avtala å gå over til Telia–Phonero som leverandør av teletenester. Overgangen vil ta til 29. november, etter at heradet har vore kunde hjå konkurrenten Telenor i over 20 år.
Kvam herad er på telesida med i eit innkjøpssamarbeid med 36 andre kommunar og verksemder som er knytte til kommunane i Vestland og Rogaland. I fjor vår vart oppgåva lagt ut på anbod. Telia–Phonero vann altså kampen om verta leverandør.
Har utsett
Dei fleste av kommunane har alt meldt overgang til Telia–Phonero. Kvam herad har utsett i det lengste å gå over, av di dekninga ikkje har vore tilstrekkeleg. Planen er at Telia–Phonero utbetrar denne til å dekkja behova til heradet.
– Me veit at det ikkje vert smertefritt og utan feil, skriv IKT-konsulent Svein Egil Kvale på kvam.no.
– Kring 30 kommunar har sidan august gjort det same, og det har gått bra med dei, presiserer han.
Ikkje alle straks
Alle mobilnummer til heradet vil vera dei same etter overgangen. 300 mobilabonnement vil verta konverterte. Dei resterande abonnementa vil gjennom dei seks komande månadene verta overførte til Telia–Phonero etter kvart som verksemda byggjer ut dekningsområdet i Kvam.
Telia–Phonero har lova fire nye sendarar i Kvam som skal dekkja dei «kvite» områda i heradet. I tillegg vert det bytt sendarar i Tokagjelet, opplyser Kvale.
– Ver merksam på at me ikkje overfører alle telefonnummer til Telia–Phonero i denne omgang, men tek resten i løpet av neste år ettersom dekninga vert styrkt, skriv IKT-leiar Hans Christian Berstad.
Held på nokre nummer
Sentralbordet vil bestå. Det handterer innkomande samtalar på hovudnummeret, svarar på eventuelle spørsmål og vidarekoplar til sakshandsamarane.
Nokre godt kjende nummer vert vidareførte ved at dei vert vidarekopla til mobilnummer som ei overgangsordning.
– Det vert nok litt armar og bein i starten, då dette er relativt store endringar for nokre, skriv Berstad.
Det vert mange endringar for dei tilsette i denne perioden, så me ber om at folk er tolmodige med oss. Ein del innarbeidde telefonnummer som mange nyttar rundt om i bygdene, vert ikkje vidareførte, skriv Berstad.
Særskilt sentralbordet skal læra seg eit nytt program og nye ringemønster. Det kan difor verta travelt på sentralbordet dei komande vekene, opplyser IKT-leiaren.
