Gang- og sykkelvegplan på Kvamskogen er klar

Framleis set det mykje omtala kravet frå 2011 ein stoppar for utbygging på delar av Kvamskogen. Berre utebuer, tilbygg og auka utnytting som ikkje fører til fleire einingar og nye einingar som er i samsvar med plan godkjend før år 2000, vert godtekne mellom landhandelen og den tidlegare Ungdomsheimen-tomta.

Snart kan denne «mørketida» vera historie, etter vel tre års arbeid med ein plan for ein forenkla gang- og sykkelveg mellom Alhovden og landhandelen. Han skal koma i staden for ein meir avansert og kostesam gang- og sykkelveg med to planfrie kryssingar som tidlegare er regulert av Statens vegvesen.

Ingen garanti

Nokon garanti for at vegen tek tabbe på rekkjefylgjekravet, har Kvam herad ikkje. Leiar for eining for plan og byggjesak, sakshandsamar Heidi E. Ørjansen, opplyser at det ikkje finst nokon skriftleg lovnad frå overordna styresmakter som sikrar at vegen vil fjerna kravet.

I planomtalen er det berre vist til ein tidlegare telefonsamtale mellom ordførar Torgeir Næss og dåverande fylkesmann Lars Sponheim, der sistnemnde skal ha formidla at ein reguleringsplan vil innebera at kravet vert stroke. Sidan er Sponheim erstatta av Liv Signe Navarsete. Kva ho meiner om saka, veit enno ingen.

– Me må berre anta at grunnlaget for å trekkja kravet vil vera der. Politikarane kan bestemma korleis dei vil gjera dette, seier Ørjansen.

Ho minner om at fylkeskommunen i eit tidlegare brev har hevda at berre Statens vegvesen, som i si tid fremja kravet, kan trekkja det.

Slik vert det

Tysdag og onsdag får planutvalet og formannskapet eit planutkast på bordet, berre vel 14 dagar etter at Kvam herad leverte planframlegget til seg sjølv. Om politikarane er nøgde, vert det sendt på høyring.

Den skisserte vegen på sørsida av fylkesvegen er i grove trekk i samsvar med den gamle reguleringsplanen for strekninga og med kommunedelplanen frå 2011.

Planen er å byggja på eksisterande terreng. Vegen skal vera 3,5 meter brei. Tre bruer trengst. Dei vert dimensjonerte etter venta flaumnivå. Vegen vert universelt forma så langt det lèt seg gjera, ifylgje planomtalen.

Planen legg opp til at dei mjuke trafikantane skal kryssa fylkesvegen utan bru på to tilrettelagde, lyssette stader utan gangfelt nær Kvinnhovden og Ungdomsheimen-tomta. Den gjeldande planen krev såkalla planskilde kryss.

Rådmannen legg elles opp til eit renovasjonspunkt rett sør for landhandelen, på eigedomen til Nils Åge Skeie. Han er kritisk til framlegget, mellom anna av di han meiner det vil kverrsetja areal til parkering og vera skjemmande.

Rådmannen viser til at Bir ynskjer å kvitta seg med frittståande konteinarar og samla dei på tre renovasjonsstasjonar – éin ved Tokagjelet, éin ved Eikedalen og éin sentralt på Kvamskogen. Den siste vil rådmannen plassera ved Furedalen. Ho er usamd i at tiltaket vert skjemmande, og meiner samfunnsnytten veg meir enn interessene til grunneigaren.

Den planlagde tunnelen frå Eikedalen til Steinsdalen vil redusera trafikken på Kvamskogen monaleg. Rådmannen minner om at han ikkje er finansiert og at det difor er uvisst når han vert bygd.

Null kroner

Ein rapport frå 2015 stipulerte kostnaden med den regulerte gang- og sykkelvegen til 240 millionar kroner. Mellom anna kom det fram at heile fylkesvegen måtte masseutskiftast i samband med bygging av vegen, fordi massane under vegen er ustabile.

I Kvammapakken vart det sett av ti millionar kroner til trafikksikring på Kvamskogen. Pakken er ifylgje rådmannen tom for pengar, utan at det er bruka ei einaste krone på Kvamskogen. Det som ligg att av pakken, er eit massedeponi som vart godkjent på vilkår av at vegvesenet stelte det fint til. Det er ikkje gjort.

Leiar for eining for plan og byggjesak, sakshandsamar Heidi E. Ørjansen, opplyser at det vert ein jobb for Kvamskogen Næringslag og heradet å prøva å skaffa pengar til å byggja vegen etter at planen er vedteken. Ho veit ikkje kva kostnaden er stipulert til.

Ørjansen fortel at Kvam herad har teke på seg å regulera vegen, sjølv om han i stor grad vil gagna ikkje berre offentlege, men også private interesser. Ho påpeikar at berre interne ressursar, ikkje eksterne konsulentar, er nytta til arbeidet. Ein del av kunnskapen er tilgjengeleg i nokså nye rapportar knytte til både kommunedelplanen for tunnel forbi Tokagjelet og kommunedelplanen for Kvamskogen. Ei deling av kostnaden med arbeidet har ikkje vore drøfta, fortel ho.

Lang historie

Kvamskogen Næringslag prøvde fyrst frå 2017 å få gang- og sykkelvegen på plass gjennom ein dispensasjon frå dagens reguleringsplan, og fekk på plass ei rekkje avtalar med grunneigarar om å avstå grunn. «Snarvegen» gjekk i vasken då det vart klart at Statsforvaltaren ikkje gjekk med på at ein dispensasjon var godt nok til å fjerna rekkjefylgjekravet. Han kravde reguleringsplan.

«Det var motlaust lenge», skriv rådmannen i planomtalen.

I staden oppmoda fylkeskommunen Kvam herad om å gå med på å redusera fartsgrensa til 60 kilometer i timen. Sjølv om det vart ei politisk hastesak, hadde ikkje fylkeskommunen stor hast med å realisera tiltaket. Fyrst i sommar kom 60-skilta omsider på plass ved Røyrli og Kvernelva.

Planomtalen vert avslutta på både utradisjonelt og ubyråkratisk vis med eit dikt der grunneigar Olav Skeie Lid tryglar om å fjerna rekkjefylgjekravet. «I 12 år har dei glist over rekkjefølgjekravet, som dei klarte tre ned over Kvam», skriv Lid.