Fyrst bygging, så tilgjeving
Avløpsanlegget i Svåsandhagen byggjefelt er på plass for lengst, men kommunen sikra seg ikkje løyve til å byggja det.
Kommunen har difor sendt på høyring ein søknad frå seg sjølv om løyve til anlegget, som vart utført av Folgefonn Entreprenør AS på vegner av Jondal kommune.
Anlegget vart bygt i 2018, då sistnemnde rådde formalitetsgrunnen. Tiltaket er ifylgje Ullensvang kommune i hovudsak i tråd med reguleringsplanen for området, men ein del av det ligg i landbruks-, natur- og friluftsføremål i kommuneplanen for Jondal, som framleis gjeld. Dispensasjon frå både føremålet og byggjegrensa langs sjøen er såleis turvande.
I dispensasjonssøknaden heiter det at tiltaket er naudsynt for å sikra eit forsvarleg anlegg og ei samfunnsteneste som har mykje å seia for livskvalitet og folkehelse, og at tiltaket er lite og ikkje påverkar nærmiljøet eller storsamfunnet på uheldig vis.
I februar 2022 gav kommunen utsleppsløyve, som heller ikkje vart ordna i 2018, på vilkår mellom anna av at anlegget fekk dei naudsynte dispensasjonane. Konsulent Cowi AS søkte fyrst om løyve til tiltaket på vegner av kommunen i februar 2022. Etter sju månader svara kommunen at søknaden var mangelfull.
Fylkeskommunen har bede om og fått utsett frist til 8. august for å uttala seg i saka.
