Fylkesutvalet støtta gondolbane i Odda
Med éi stemme i overvekt støtta fylkesutvalet i Vestland planane om gondolbane mellom Odda sentrum og fjellet Rossnos.
Det var Ap som sikra fleirtal for å støtte planane, skriv NRK. Det er store interessekonfliktar i saka, og fylkesdirektøren hadde tilrådd at fylkesutvalet skulle fremje motsegn til planen frå selskapet Hardanger Lift om å byggje gondolbane.
«Det føreslegne tiltaket er stort i arealomfang, og strekkjer seg frå Odda sentrum til høgfjellet. Tiltakshavar ønskjer å leggje til rette for ein pendelbane mellom Odda sentrum (Smelteverkstomta) og fjellet Rossnos (1407 moh). Det er eit omfattande og godt utgreiingsarbeid som er lagt til grunn for planforslaget, men saksomfanget synleggjer også store interessekonfliktar. Ein vurderer det føreslegne tiltaket til å ha positive verknader for regionsenteret Odda, og Odda sentrum, medan det har negative konsekvensar for mellom anna landskap, natur og særleg villreininteresser på høgfjellet», heiter det i innstillinga.
Artikkelen held fram under annonsen.
Men fleirtalet i fylkesutvalet støttar altså planane, mot stemmene til mellom andre MDG.
– Villreinen er allereie jaga av bygging av vegar, bustadar og hytter. At Ap vil jaga han enda meir med ei naturraserande gondolbane er eit svik mot vårt internasjonale ansvar for utryddingstruga villrein, og ikkje minst mot naturen, skriv fylkesvaraordførar Natalia A. Golis (MDG) til NRK.
(©NPK)
