Fylkesordføraren vitja helseføretak
Helse i Hardanger AS (HH) treng pengar for å halda fram med behandlingsprosjekt. Førre veke bad dei fylkesordføraren om råd.
– Me har kome til ei økonomisk kneik som me må koma oss over, seier dagleg leiar i HH, Sissel Aase Børve.
I helselokala i Øystese la ho førre veke fram dagens situasjon for fylkesordførar Jon Askeland (Sp) i Vestland fylkeskommune og representantar for Hardangerbadet AS og Kvam herad.
Føretaket manglar ei permanent finansiering. Tidlegare i januar kom det fram at det treng pengar for å halda fram med behandlingstenester, og at covid-19-behandlinga mellombels er stogga på grunn av pengemangel i Helse Bergen.
Til HF opplyser fylkesordføraren at han er klar over utfordringane HH står i. Sjølv om fylkeskommunen ikkje har noko å gjera med HH direkte, ynskte han meir informasjon om situasjonen.
– Me i fylkeskommunen kan koordinera og vera Vestlandet si røyst. Når eg skal venda meg til stortingspolitikarar og regjeringa, må eg ha fakta under huda, seier han.
Medan Børve informerte om utfordringane, men også om drifta generelt og samarbeidet internt på huset, heldt Anita Storemark, dagleg leiar i Hardangerbadet AS, ein presentasjon om aktivitetane i bygget og vidare planar. I tillegg presenterte Hans Jørgen Andersen, dagleg leiar i Øystese Utvikling AS og nestleiar i styret i Hardangerbadet, om masterplanen for Øystese.
Børve vonar at møtet med mellom andre fylkesordføraren vil vera eit steg i rett retning for HH.
– Me har fått nokre gode, konkrete råd som me vil ta med oss vidare, seier ho.
