Fylkesnes vert sjukeheimslege
Kvam herad har tilsett Svein Ivar Fylkesnes som sjukeheimslege.
Det opplyser HR-sjef i Kvam herad, Kari Sagen. Det var ti søkjarar til stillinga.
Fylkesnes skal ha ansvar for 16 korttidsplassar ved Kvam behandlings- og rehabiliteringsavdeling og ei langtidsavdeling med 16 plassar på Toloheimen og fem langtidsplassar ved Strandebarm omsorg. I tillegg til pasientarbeidet fylgjer det med stillinga ansvar for system, rådgjeving av helsepersonell og samtalar med pårørande.
Sjukeheimslegen byrjar i fulltidsstillinga 1. mars.
Fylkesnes har ei tilsvarande stilling ved Øysteseheimen, opplyser Sagen. Difor har han fått ein delt arbeidskontrakt, slik at han også har ansvar for pasientar i Øystese fram til ein ny sjukeheimslege er på plass der.
– Fylkesnes er tilsett i legetenesta og er ikkje knytt til ein fast lokasjon, men han kjem til å ha basen sin på Toloheimen, seier Sagen.
