Fylkesfråsegn speglar ikkje lokal knurring

23. januar skal fylkesutvalet vedta fråsegna om meldingane om nye kraftleidningar mellom Sauda og Øygarden.

Meldinga frå Statnett SF om strekninga frå Mauranger til Samnanger har ført til lokale protestar både i folkemøte og i skriftleg form. Mellom Nordrepollen og Belsnes ynskjer føretaket å riva den gamle lina over Isdalsskardet og erstatta henne med ei ny lenger vest og monaleg nærare både fjorden, fleire stølar og mykje nytta turområdet.

Fylkesdirektøren, derimot, er ikkje ottesam for fylgjene i dette området. For medan han til dømes føreslår å krevja at sjøkabel vert greidd ut som alternativ løysing forbi Rosendal, nemner han knapt områda i gamle Jondal med ein knyst i den føreslegne fråsegna. Heller ikkje kryssinga av fjorden ved Belsnes er omtala.

– Lågt konfliktnivå

Det næraste ein kjem, er at han i sjølve saksutgreiinga skriv at alternativ 2.0 på Maurangsneset bør visualiserast frå lokalitetane på Årsand. Vel å merka er ikkje ynsket nemnt i sjølve innstillinga. Vidare vert det nemnt at dei skisserte alternativa mellom Mauranger og Belsnes går gjennom eit registrert friluftsområde ved Kysnes, men administrasjonen skriv at «konfliktpotensialet når det gjeld friluftsliv ser ut til å vere relativt lågt fram mot kryssinga av Hardangerfjorden».

Det meste av plassen i dei 19 sidene med sakspapir går med til å omtala strekninga frå Samnanger til Øygarden. Saka er skriven etter ein innspelsrunde i administrasjonen.

Fylkesdirektøren føreslår å stilla seg generelt positiv til å styrkja kraftnettet, som han meiner vil vera i tråd med både den regionale planen for fornybar energi og med utviklingsplanen for Vestland. Ei ny kraftline til bergensområdet trengst for å auka verdiskapinga og opna for nyetableringar i industrien.

– Ei ny line er samfunnsmessig særs viktig. Ingen av traséalternativa vil vera utan konfliktar. Val av trasé vil ha stor påverknad på graden av negative effektar, skriv fylkesdirektøren.

Saka vert fyrst drøfta av hovudutval for næring 21. januar.

Krev dagens trasé

Fleire grunneigarar på Kysnesstrand stiller seg bak ei fråsegn som Olav-Magnus Hammer og Sunniva Kysnes Skogseth har gått i bresjen for å forma. Her skriv dei at utbygginga er naudsynt, men at grensa er nådd. Folk vil ikkje lenger gje frå seg urørt natur som før, heiter det i konklusjonen.

Grunneigarane meiner primært at traséalternativa 1.0, 1.4 og 1.5, som er ulike variantar av å flytta lina nærare fjorden, må droppast, og at dagens trasé må greiast ut. Det same må sjøkabel heilt frå Ljones til Mauranger. I lys av at lina vil skaffa inntekter i kanskje 80 år, må Statnett leva med ein høgare byggjekostnad, ifylgje innspelet.

Om dei tre nemnde traseane ikkje vert fjerna, meiner grunneigarane at naturmangfald og urørt natur, friluftsverdiar, naturen sett frå fjorden, fylgjer for råka stølar og tap av næringsinntekter må vurderast.

I fråsegna, som er illustrert med ei rekkje bilete, vert mellom anna fylgjene for fjordlandskap, fauna, urørt natur og friluftsliv framheva. Grunneigarane set spørjeteikn ved påstanden frå Statnett om at klima og vêr gjer dagens kraftline ueigna, og om at det har vore fleire havari. Også det føretrekte alternativet vil liggja i område med mykje skodde og dårleg vêr, og faktisk i eit dårlegare klimatologisk område enn den gamle lina, heiter det i innspelet.