— Fyking forstyrrar fuglane
Stien til Håsete skal betrast, men ikkje i sommar.
Som HF skreiv tidlegare i sommar, vil Bergen og Hordaland Turlag (BHT) utbetra stien til Håsete. Laget har fått landingsløyve frå Kvam herad for inntil 40 turar med helikopter for å gjera arbeidet. Løyvet gjeld for sommaren 2021.
Oddvar Soldal, styremedlem i Naturvernforbundet i Kvam, klaga på løyvet. I klagen viser han til at det aktuelle området er viktig for hekking for ryper, særleg lirype og orrfugl. Han skriv at den ekstra uroinga frå helikoptertrafikken kan føra til at heile eller delar av fuglekulla vert utrydda.
— Me er ikkje mot at stien vert utbetra, men tidspunktet er heilt feil med omsyn til fuglelivet, skriv han.
Han meiner at slutten av august eller byrjinga av september er ei betre tid.
Helene Ødven, dagleg leiar i BHT, skriv til Soldal og Kvam herad at ein kan venta med arbeidet.
— Me ventar sjølvsagt til over sommaren, skriv Ødven.
