Funderer på oljemysterium
Den siste veka har Kvam brann og redning pumpa opp fleire hundre liter olje frå kummane utanfor Hardanger Brygge. Det er uvisst kva olje det er og kvar ho kjem frå.
12. juni vart det observert oljefilm på sjøoverflata i Norheimsund. Kvam brann og redning konkluderte med at det var for lite til å setja i gang tiltak. Fire dagar seinare fekk brannvesenet ein telefon frå styret i leilegheitskomplekset Hardanger Brygge 1.
– Fleire bebuarar melde om at dei vart dårlege av oljelukta som trengde inn i bygget, seier styreleiar Svanhild Birkenes.
Låg i kummar
Brannvesenet byrja undersøkja kvar lukta kom frå. Mannskap søkte mellom stranda og kaien i Norheimsund. Så vart det teke kontakt med teknisk vakt i Kvam herad, som har ansvar for vatn og avløp.
– Me trudde i utgangspunktet at olja kom frå sjøen, men ho viste seg å liggja i ein kum, fortel brannsjef Torleif Ones i Kvam herad.
Olja vart oppdaga i røyrsystemet for overflatevatn. Ho hadde samla seg mellom to kummar utanfor Hardanger Brygge og begynt å leka ut i sjøen. Brannvesenet har lagt ut lenser og absorbentar i vatnet for å samla opp olja. Ones fortel at dei også nyttar store pumper for å få ut olja av kummane. Arbeidet har teke fleire dagar.
– Me har funne over to tusen liter olje, seier Ones.
Uvisst om kjelde
Brannvesenet har teke prøvar av olja, og ventar på svar. Ifølgje Ones er det truleg snakk om fyrings- eller dieselolje.
– Nokon manglar olje, men me har ikkje klart å finna ut kven, seier Ones.
Olja som er pumpa opp, vert levert til attvinning som spesialavfall. Ones fortel at brannvesenet får ureiningsoppdrag rett som det er
– Det er viktig at folk melder frå om slike ting, seier han.
