Fuglafjell AS skal byggja brannstasjon
Voss herad har gjeve Fuglafjell oppdraget med å byggja ny hovudbrannstasjon på Tvildemoen.
Ifølgje Arne Lunestad, dagleg leiar i Fuglafjell, er kontrakten verd om lag 80 millionar kroner.
– Dette er eit oppdrag som treffer oss veldig godt. Bygget ligg i vårt kjerneområde, og sidan me har bygd brannstasjonen i Kvam, er dette ein kjend bygningstype, seier han.
Miljøomsyn gjer at brannstasjonen skal byggjast i massivtre. Heller ikkje det er nytt for Fuglafjell.
– Me har jobba med dette materialet tidlegare, og kjenner føremonane og ulempene med å byggja i massivtre. Ein treng mellom anna ekstra gode rutinar for å halda kontroll på fukt i byggjefasen, fortel Lunestad.
Målet er å koma i gang med arbeidet så snart som mogleg, slik at ein kan få tett bygg før vinteren. Prosjektet vil ha ei byggjetid på om lag 18 månader.
Fuglafjell vart etablert i 2015, då fleire verksemder vart samde om å samarbeida for å kunna konkurransen om større prosjekt. Det første oppdraget var å byggja fire kommunale barnehagar i Kvam. Sidan har Fuglafjell fått fleire store oppdrag i Kvam og nabokommunane.
Johs Øvsthus AS, Tecno VVS AS og H2 Hardanger AS eig i dag Fuglafjell.
