Frp krev 400 milliardar ekstra til Nasjonal transportplan – Ap og SV sjokkert
Framstegspartiet vil auke ramma i Nasjonal transportplan med ein tredel og fjerne bompengane heilt. SV riv seg i håret, medan Ap kallar forslaget eit luftslott.
– Eg har jo følgt dei to fartsglade og asfaltkåte samferdselsministrane frå Frp tett, og skulle vel eigentleg ikkje bli overraska. Men dette er verre enn mitt verste mareritt, seier SVs samferdselspolitiske talsperson Arne Nævra til NTB.
Torsdag sa Frps transportpolitiske talsperson Bård Hoksrud til NTB at partiet vil gå inn for å auke Nasjonal transportplan (NTP) med 400 milliardar kroner.
Artikkelen held fram under annonsen.
– Vi gønnar på!
Saman med partileiar Sylvi Listhaug er han no klar til å leggje fram den fulle kravlista til partiet i stortingsforhandlingane om regjeringsforslaget til Nasjonal transportplan for 2022 til 2033.
Planen har ei ramme på 1.200 milliardar kroner. Den vil Frp altså auke med ein tredel til 1.600 milliardar kroner.
Ifølgje Hoksrud har samferdselsminister Knut Arild Hareide (KrF) trekt i pengebremsen. Det skal Frp sørgje for å reversere.
– Framstegspartiet tek det handbrekket heilt ned igjen, og så gønnar vi på!
– Luftslott
Utspelet får SV til å rive seg i håret.
– Frp skit fullstendig i miljø- og klimaspørsmål. Her er det nedbygging, utbygging som gjeld – på kryss og tvers i Noreg, seier Nævra.
Også Arbeidarpartiet meiner forslaget er fullstendig urealistisk og useriøst.
– Det er synd Frp med dette bidreg til å gjere NTP til eit luftslott det ikkje er mogleg å realisere, i staden for eit viktig plandokument for transportsektoren, seier Aps Sverre Myrli til NTB.
Artikkelen held fram under annonsen.
Krev bompengeslutt
Eit hovudkrav frå Frp er slutt på bompengar. Heile 123 milliardar kroner skal plussast på for å betale ned gjeld i eksisterande bompengefinansierte vegprosjekt, medan nye prosjekt skal gjennomførast utan at det blir kravd bompengar.
– Vi har allereie foreslått i Stortinget å ta pengar frå infrastrukturfondet og rett og slett betale ned bomprosjekt, seier Listhaug.
– Vi er opptekne av at folk skal kunne flytte seg rundt utan å betale skjorta for det. Derfor er vi veldig kritiske til bompengar, for dei går faktisk rett ut av lommeboka til folk, supplerer Hoksrud.
SV vil på si side øyremerkje ein del av bompengane til jernbaneutbygging.
– Skal vi klare å få eit betre jernbanetilbod, kjem vi ikkje utanom bompengar, seier Nævra.
Ønskjer høgfartsruter
Alt i alt vil Frp auke veginvesteringane med 320 milliardar kroner utover regjeringsforslaget, inkludert summen som skal gå til avvikling av bompengeordninga.
I tillegg skal det setjast av 60 milliardar kroner ekstra til jernbaneinvesteringar og ei godspakke, og løyvingane skal aukast betydeleg til vedlikehald av vegar og jernbane og til rassikring.
Hoksrud trekker fram tre prosjekt som spesielt viktige:
Artikkelen held fram under annonsen.
* Riksveg 4: Her kjempar Frp for firefelts motorveg.
* E134 og E6: Frp går inn for gjennomgåande høgfartsruter mellom aust og vest og nord og sør.
* Ringveg aust: Frp vil sikre midlar til å føre E39 utanom Bergen sentrum.
Derimot vil Frp ha byvekstavtalane vekk. Dette kan ifølgje partiet gi meir enn 30 milliardar kroner i innsparingar.
Opnar for auka oljepengebruk
Finansieringa skal sikrast gjennom kraftige kutt i budsjettpostar som innvandring og integrering, bistand og klima.
Men Frp er òg førebudd på å hente pengar ut av oljefondet.
– Absolutt. Vi har alltid vore for å bruke pengar på å byggje landet òg, i staden for berre å sylte alt ned i aksjar, handlegater og alt mogleg, seier Listhaug til NTB.
– Men vi skal ikkje berre ta nye oljekroner. Vi ønskjer òg å prioritere budsjettkronene annleis, seier ho.
Artikkelen held fram under annonsen.
Forhandlingane i Stortinget skal etter planen avsluttast innan 7. juni.
(©NPK)
