Friskule ynskjer å setja opp brakker

Eigar vil vera eigedomsselskapet KKS Eigedom DA, som eig dagens skulebygg. Alle bygga vil vera leigde ut til friskulen. Søknaden gjeld ein periode på fem til ti år. Storleiken på brakkebygget er oppgjeven til 120 rutemeter.

Også Framnes Kristne Vidaregåande Skule søkte nyleg om å få setja opp eit mellombels brakkebygg.

Friskulen har i dag 39 elevar. I fjor på denne tida hadde han 29 elevar, fortel rektor Brit Gjerde Voster.

Difor byggjer ein ut

Skulen byggjer ut fordi han har for få store rom til å samlast i. Ein brukte tidlegare skulekjøkenet til fellesrom, men etter at det vart pussa opp, vart det for lite. Det er litt dumt å bruka gymsalen til samlingsrom, synest rektoren. Med utbygginga får ein eit stort klasserom og eit mindre grupperom, pluss toalett.

— Då er me hjelpne, seier Voster.

Kostnaden med bygget vert kring ein halv million kroner. A/Stab AS er leigt inn for å gjera papirjobben med søknadene.

Å setja opp brakker er likevel billegare enn å byggja ut. Eigedomsselskapet har kjøpt inn fem brakker frå Tysnes skule, og må planera og laga til for straum, vatn og kloakk.

Stadig fleire elevar

Skulen er alt godkjend for 65 elevar. Talet på elevar har stige jamt, og viss det vert høgare enn 65, trur rektoren at ein må utvida dei eksisterande bygga.

Oppstarten etter skuleferien har vore god, med mange nye elevar, seier Voster. Skulen har ikkje vore plaga med koronasmitte.

— Me spritar oss heile tida og har fokus på hygiene. Det viktigaste me gjer er å vaska oss og å halda avstand der me kan, seier rektoren.

Folk er velkomne til å koma og bruka området ved skulen, opplyser ho. Mange brukar fotballbanen i helgane. Skulen skal setja opp ein gapahuk og laga ein bålplass.

Treng dispensasjon

For å få byggja, treng skulen mellombels dispensasjon frå reguleringsplankravet i kommuneplanen.

Ein må òg søkja om løyve til tiltak etter plan- og bygningslova. Skulen må dokumentera at slamavskiljaren er dimensjonert for planlagd bruk, og Arbeidstilsynet må søkjast om løyve til å setja opp brakkene.

Området er regulert til offentleg og privat tenesteyting.

Kvam herad har lova skulen å prioritera saka, slik at dispensasjonssøknaden ikkje skal seinka prosessen.

Arbeider dels på dugnad

Dagleg leiar Asgeir Norheim i Asgeir Norheim Byggmeister AS, som reiser brakkene, understrekar at bygget enno ikkje er godkjent av heradet.

Det har ikkje vore nokon anbodskonkurranse. Ein del av arbeidet vert gjort på dugnad, og førebels har Norheim ikkje teke betaling. Det vil endra seg når bygget skal reisast.

— Kvifor arbeider du dugnad?

— Eg er involvert i skulen og i eigedomsselskapet som eig han. Eg ynskjer å gjera det på billegast mogleg måte, seier Norheim.