Frisbeegolfbana går frå 9 til 18 hol
No får du ni nye sjansar til ein «hole-in-one», eller til å kasta bort den nyinnkjøpte frisbeen.
Frisbeegolfgolfbana i Tolomarka i Norheimsund har blitt mykje brukt sidan den opna i månadsskiftet mai–juni i år.
– Eg har framleis til gode ikkje å møta folk her når eg spelar, seier Frede Hatlen, baneansvarleg i Kvam Frisbeegolf.
Ifølge appen ein brukar for å registrera spelerunden sin, har banen hatt rundt 350 unike brukarar, og totalt 2.879 spelerundar, når HF snakkar med Hatlen.
Hatlen mistenker at dei reelle tala er det dobbelte. Det er nemleg ikkje alle som registrerer når dei spelar.
Doblar speleområdet
Banen består i dag av ni hol. Men i haust fekk klubben løyve av heradet til å utvida banen med ni hol til, på heradet sin eigedom.
Frisbeegolfklubben har sjølv ansvar for å bygga banen og vedlikehalda området.
– Me har hatt planar heile tida om 18 hol, men me tenkte å bli heilt ferdige med dei første ni først, seier Hatlen.
Mykje arbeid
Dei er godt i gang med å rydda området, men det er mykje som skal gjerast.
Mange har bidratt med mykje dugnadsarbeid. Sjølv slutta Hatlen å tella timar etter 100, seier han.
Håpet er å ha heila 18-holsbana klar til sommaren.
– Får de jobba gjennom vinteren?
– Det spørst kor mykje snø som kjem, men me har heldigvis litt tid enno til å få gjort så mykje som mogeleg før den tid, seier Hatlen.
