Friksjonsdoktoren

Fredag 30. august presenterte Auganæs oppgåva han har arbeidd med i fire år. Han er tilknytt fakultetet for ingeniørvitskap og instituttet for bygg og miljøteknikk på Norges Teknisk-Naturvitenskapelige Universitet NTNU i Trondheim. Auganæs har vore med på å utvikla instrument for å måla friksjon på langrennsski.

Disputasen starta med ei prøveførelesing. Temaet hans var kor nøyaktig ein må vera i utforminga av måleinstrument for sportsteknologi i ulike idrettar. Han presenterte òg funna i doktoravhandlinga si, før han måtte svara for seg i ein nesten to timar lang diskusjon.

– Eg var spent på førehand. Sidan eg har jobba med dette så lenge, betyr det ein del. Det gjekk heldigvis greitt, seier Auganæs.

Oppgåva er ganske snever, og han vil ikkje ta på seg æra for å ha kome på det sjølv. Han har nemleg arbeidd saman med Madshus AS og Swix Sport AS om å utvikla fluorfri skismurning. For å få dette til, var det naudsynt med ein testmetode for å samanlikna produkta. Han fortel at skismurning ofte vert testa ute i felt, og at resultata ikkje er like nøyaktige som dei ein får i eit laboratorium. Difor har han prøvd å finna ein metode der friksjonen til langrennsski kan testast i stabile former.

– Har du lukkast med å utvikla eit nytt måleinstrument?

– Eg har lyst til å svara ja, men eg kan vel ikkje heilt seia det. Eg har bidrege med informasjon og testar, og slik bidrege til produktutviklinga, seier Auganæs.

Etter disputasen var det klart for feiring. Feiringa gjorde han med ein middag på kvelden saman med foreldra, besteforeldre og annan familie, rettleiarar, komiteen som vurderte oppgåva, kompisar og kollegaer.

– Det var overveldande med så mange fine ord. Feiringa var hyggeleg, men det er litt trist at det er slutt etter så mange år, seier han.

Nokon ny jobb har han ikkje sikra seg enno. Helst vil han jobba vidare med forsking og utvikling i ei bedrift, men det finst ikkje mange slike stillingar innanfor sportsteknologi. Kanskje må han i staden bruka ingeniørbakgrunnen.