Frifunnen for nedlasting av overgrep mot born
Mannen frå Kvam hadde lagra kring 100.000 filmar og bilete med seksuelt innhald. Berre éin av filmane var ulovleg.
I april 2018 lasta ein mann ned ein film som viste eit seksuelt overgrep mot eit barn, og delte filmen med ein annan Facebook-brukar. Vel to år seinare lasta han ned ein annan video som viser eit seksuelt overgrep mot eit barn.
Mannen avviste ikkje nedlastingane, men forklara i dåverande Hardanger tingrett at han ikkje visste kva filmane inneheldt.
Gjennomgangen av pc-en til mannen synte at han hadde i alt 200.000 bilete og videofiler. Om lag halvparten var av seksuell karakter, men berre ein av dei er av politiet vurdert til å vera ulovleg. Filmen var sletta.
Mannen forklara i retten at ein annan Facebook-brukar bad han finna videoar av yngre menn. Han lasta ned fire og sende dei, utan å sjå på dei. Den eine viste seg altså å visa eit barn.
Tingretten meiner det støttar forklaringa hans at berre éin av kring 100.000 filmar på pc-en hans var ulovleg. Om han var på jakt etter overgrep mot born, skulle ein tru at det fanst meir ulovleg materiale, ifylgje domen.
Politiet i Kvam fekk melding om nedlastingane frå Kripos.
Mannen vert dømd for to andre forhold. Han vart stoppa i bil med ein kniv i hanskerommet, og vert dømd for å ha bore kniv utan god grunn. Mannen forklara i retten at kniven hadde lege der lenge og at han vart nytta i samband med arbeid. Retten meiner det ikkje gjev han rett til å ha ein kniv lett tilgjengeleg heile tida. I tillegg vert mannen dømd for å ha hatt ei lita mengd cannabis heime.
Han fekk ei bot på 6.000 kroner. Påstanden frå aktor var fengsel i 30 dagar.
