Fretex får ha sju tøyboksar i Kvam
Det går fram av ein avtale mellom Fretex Miljø AS og Kvam herad.
Fretex har søkt om å ha boksar til innsamling av klede ved Mundheimsvegen på Oma, Strandebarmtunet i Strandebarm, Dalheim i Tørvikbygd, Vikøyevja i Vikøy, Tolohagen ved Rema 1000 i Norheimsund og ved Storeteigen og Sjusetevegen i Øystese.
I Kvam herad sine retningsliner for plassering av innsamlingsboksar på kommunal grunn er det definert kvar innsamlingspunkta skal vera. På kvart punkt kan det stå mellom tre og fem boksar. Avtalen seier at Fretex får ha boksane på dei definerte plassane.
I avtalen står det at Fretex har ansvar for boksane og at området rundt dei skal vera ryddig. Fretex skal sørgja for at boksane er rett merkte, at dei er godt haldne ved like og at dei har sensor for å visa når boksen er klar for tømming. Sensorane skal sikra at boksen vert tømt før han vert så full at folk set klede på utsida av han.
