– Fremjar ikkje respekt for fartsgrensa

– Det fremjar ikkje respekt for fartsgrenser med 60-sone på ein stad som Kvamskogen, sa han då formannskapet drøfta framlegget om fartsgrensereduksjon mellom Tokagjelet og Eikedalen.Ein permanent reduksjon i fartsgrensa fall på steingrunn i det politiske miljøet. Dei folkevalde er samde med rådmannen i at vegvesenet i staden bør vurdera elektronisk skilting som regulerer farten etter trafikkmengda og aktiviteten, gjerne styrt frå Vegtrafikksentralen. Dessutan ber dei vegvesenet avvikla reflekskampanjar på Kvamskogen.Fleire meiner vegvesenet har grunngjeve og greidd ut framlegget altfor dårleg eller ikkje i det heile teke. Det er basert på at det er kome eit ukjent tal ynske om reduksjon i farten.

– Fremjar ikkje tryggleik

Vegvesenet har rekna ut at reisa over Kvamskogen vil ta to minutt meir med dei føreslegne grensene på 60 og 70 kilometer i timen. Ljones meiner det i praksis vil ta meir tid av di trafikantane vil få vanskar med å koma seg forbi større køyretøy i 60-sona.– Ein vil få opphoping av trafikk og irriterte trafikantar som kanskje føretek forbikøyringar dei ikkje burde føreta. Det fremjar ikkje trafikktryggleiken i det heile. Og er vegen smal og brøytekantane høge, går farten ned uansett, sa Ljones.Han viste i tillegg til at mange av dei registrerte ulukkene i området har hendt i Tokagjelet eller på vegen frå Eikedalen mot Frøland.Kari Mostad (MDG) meiner redusert fartsgrense er eit rett tiltak, men at det kan avgrensast til enkelte periodar. Etter hennar syn er det flaks at det ikkje har skjedd fleire stygge ulukker på Kvamskogen.