Fredeleg høgtid
Raudekrossen sytte for god beredskap, men fekk ein helst udramatisk påske lokalt.
– Det har vore litt rolegare enn vanleg. Det kan ha noko å gjera med vêret og at det har vore noko færre folk på tur, seier Andreas Nygård på vegner av Norheimsund Røde Kors Hjelpekorps.
Då HF snakka med han 2. påskedag, hadde han vore på hytta nær Alhovden i eit par dagar.
Ikkje stor dramatikk
Nygård opplyser at nokre mindre skadar har vore nokolunde jamt fordelte på heile påskeveka. Typiske døme er ryggskadar eller slag som gjer det vanskeleg å koma seg ned frå fjellet for eiga maskin, fortel han.
Hjelpekorpset har hatt bra med varekøyringsoppdrag og har elles styrt med mellom anna panteflasker frå innsamlingspunkta. Både øving og litt skigåing har stått på programmet elles, fortel Nygård, som konstaterer at det alltid er noko å ta seg til.
Laget har for det meste hatt mellom fire og seks på vakt heile veka, og det har for det meste gått greitt å få folk til å stilla opp og sikra ein ok beredskap heile tida, fortel Nygård.
Som HF skreiv tidlegare i vinter, har hjelpekorpset laga seg til med eit eige aksjonsrom med skjermkart på veggen. Der vert arbeid og aksjonar koordinerte og organiserte.
– Me er veldig nøgde med løysinga. Rommet vert flittig bruka heile tida. Det er stadig småting som skal organiserast saman med dei andre korpsa her oppe, og det er veldig nyttig med kartverktøyet, seier Nygård.
Treng påfyll
Frå lagshytta Dyrbu i Hamlagrø rapporterer Morten Laupsa-Borge i Øystese Røde Kors Hjelpekorps 2. påskedag om ei uvanleg fredeleg høgtid med null redningsoppdrag, men ein god del varekøyring. Jamt over har han inntrykk av at utfarten har vore moderat i år.
Dei siste dagane har han vore på vakt i lag med to andre. I starten av påsken var tre andre på vakt. Rekrutteringa er ikkje god nok enno til å fordela lasta på mange.
Laupsa-Borge er overtydd om at kombinasjonen av ny hytte og tung satsing på tilboda BARK (Barnas Røde Kors, red. merknad) og ungdomstilbodet RØFF (Røde Kors Friluftsliv og Førstehjelp) må til for å sikra at det ikkje berre er foreldre i 40-åra som må ta ansvar for både eigne born, varekøyring og beredskap på ein gong.
– Me håpar det kjem nye til dei neste åra, seier Laupsa-Borge, som vonar det vert mogeleg å setja i gang bygging av ny hytte med fasilitetar som innlagd straum og toalett i 2024.
