Fransk visitt i Fyksesund
Kvemmingane fekk ein ørliten smak av livet som cruisevert måndag morgon.
Cruiseskipet «Le Champlain» frå Frankrike fann seg nemleg ankringsplass eit stykke sør for Rossholm i 06-tida, etter å vitja Ulvik og Sørfjorden døgeret før.
Sporingstenesta Marine Traffic røper at skipet bokstavleg tala var på ein snurr og to då det passerte Ålvik midt på natta. Det gjekk nemleg i sirkel to gonger før det heldt fram mot vest.
Då HF-paparazzoen var innom Fyksesund i 09-tida, vart minst åtte ribbar med påhengsmotor sette på vatnet og fylte med turistar som skulle få oppleva Fyksesund på litt nærare hald. Båtane strøymde i flokk og fylgje under brua og sette kursen mot to av Kvams løynde perler: bustadfeltet Kassen og grenda Klyve.
Lenge på tur i sundet kan ikkje gjestene ha vore, for i 10-tida sette skipet kursen utover Hardangerfjorden igjen.
Cruiseskipet har ifylgje heimesida til operatørselskapet Ponant rom for 184 gjester. Det hyser mellom anna spaavdeling, 92 rom og suitar og to restaurantar. 118 er tilsette om bord. Skipet har sju dekk og er 430 fot langt. Namnet kjem frå den franske oppdagaren Samuel de Champlain.
Prisen for ein tur? Tja. Legg du ut vel 150.000 kroner, kan du vera med båten på tur til Noreg igjen i to veker i november. I dei billegaste romma, vel å merka.
Sjå fleire bilete frå den franske visitten her:
Les også:
