Framo reindyrkar akvakultursatsinga
Pumpesystemprodusenten Framo AS har skilt ut Framo Aquaculture som ein eigen divisjon som lagar pumper for akvakulturnæringa.
Det opplyser verksemda i ei pressemelding.
Pumper til oppdrettsnæringa har vore eit satsingsområde for verksemda sidan 2018.
I 2021 vart Framo medeigar i selskapet Stadionlaks AS saman med Lingalaks AS. Saman skal dei utvikla Stadionbassenget, eit lukka, flytande produksjonsanlegg som er planlagt å stå ferdig i 2023. Målet er å kunna utvikla og testa ny pumpeteknologi ute i feltet.
– Pumpesystema våre til akvakulturnæringa har fått ei fantastisk mottaking. Det har openbert vore eit stort behov for ein solid industriell aktør som kan utvikla nye løysingar i tett samarbeid med næringa. Samstundes er det stort behov for å gjera bransjen meir effektiv og miljøvenleg, seier Oddbjørn Jacobsen.
Han har leia divisjonen Framo Innovation sidan starten for fire år sidan, og vil no leia den nye akvakulturdivisjonen. Denne vert sidestilt med dei to andre store divisjonane i Framo, Marine og Offshore.
Akvakulturdivisjonen har til no vorte bygd opp gjennom organisk vekst og oppkjøp. Det er også utvikla eigne pumper spesielt for oppdrettsbransjen. Den største av desse kan flytta 20.000 kubikkmeter vatn i timen. Det utgjer to vanlege skulebasseng i minuttet.
– Me har ambisjonar om å byggja Framo Aquaculture til ein solid aktør innan leveransar til oppdrettsbransjen, seier Jacobsen i pressemeldinga.
