Framnes opna dørene

Det vart ei helg med mykje gøy og moro, samstundes som elevane fekk ei kort innføring i ulike fag. Dei fleste ungdomane overnatta frå laurdag til sundag og fekk erfara korleis det er å bu på Framnes.

Etter nokre timar med fagopplegg laurdag gjennom ulike stasjonar var det sosiale aktivitetar og talentiade på kvelden. 

Framnes Kristne Vidaregåande Skule tilbyr mange fag, som til dømes friluftsliv og fordjuping i volleyball. Ei kort innføring i dei ulike faga gav 10.-klassingane eit godt grunnlag for seinare fagval.

Mange reiste heim att sundag etter ei helg med mange nye venskap og mykje latter og moro. Etter undervisninga vart det høve til å bli kjent, og ein fekk tid til å prata med lærarar og elevar.

Fekk smaka skulelivet

Adriana Quispe De La Cruz (15) frå Bergen er ei av dei 86 som var på Framnes i helga. Ho syntest helga var spennande. Ho likte godt at elevane snakka på dei forskjellige fagstasjonane og at det var ulike leikar.

Me snakka også med Asgeir Olsen Seim (15).

– Eg forventar at helga skal vera sosial, forhåpentlegvis møta nokre nye og bli ven med nokon. Eg kom til Framnes på open helg fordi dette kan vera einaste sjanse til å besøkja skulen før eg må søkja i mars. Det er fint å få oppleva skolen før eg søkjer, seier han.

– Kvifor kom du til Framnes?

– Eg ynskjer dei kan hjelpa meg med å bli betre i fag som eg slit med. Det har ikkje alltid vore det beste miljøet der eg var, så eg ynskjer ein ny start litt lenger unna. Det er mange internatskular nær der eg bur, men det er ingen av dei som er like gode som Framnes. Eg har høyrt at det er mange gode lærarar, gode elevar og mykje gøy som skjer, så eg vil ta sjansen på å byrja her, seier han.

Jonathan Hardang (15) var ein annan av dei tilreisande ungdomsskuleelevane.

– Eg likte open helg veldig godt. Eg syntest den var gøy, og eg kom fordi eg hadde høyrt at Framnes var ein veldig god skule, så eg ville sjå korleis ting er, seier han.

Dansande vinnar

Laurdag kveld vart altså den årlege talentiaden arrangert. På talentiaden opptredde mange av Framnes-elevane og viste fram talenta sine. Tidlegare Framnes-elevar var til stades, pluss andre tilreisande.

Mellom mange innslag vart vinnarane av Talentiaden 2023 Nesheimsdansen, laga samla av jentene i 3. klasse. Jonathan Harang (15) synest talentiaden var veldig gøy, spesielt den nemnde dansen.

Artikkelforfattarane er mediefagelevar på Framnes Kristne Vidaregåande skule. HF gjer merksam på at Jonathan Hardang er bror til den eine av dei. Red.