Framnes er førebudd på både gult og raudt
— No går me attende til slik me hadde det for vel eit år sidan. Me er klare og veit kva som må til for å halda meteren.
Det seier Harald Voster, rektor på Framnes Kristne Vidaregåande Skule, til HF onsdag.
Torsdag morgon går skulen over til raudt tiltaksnivå. Ifylgje Voster er planane klare for dei komande skuledagane.
Elevane på Framnes rakk akkurat å gjennomføra ein planlagd aktivitetsdag. Opplegget, som i hovudsak skulle ha gått føre seg over fleire dagar, vart komprimert til ein lengre dag tysdag. Såleis fekk elevane ein god dose fellesskap og aktivitet, i tillegg til at dei skal avspasera fredagen, fortel Voster.
Onsdag vart ein vaske- og lesedag for ungdomane på Framnes. Ifylgje rektoren brukar elevane å vaska romma på skulen før joleferien. Resten av tida nytta dei til førebuing til heildagsprøven på skulen torsdag.
Etter planen skulle alle elevane hatt ei felles avslutning i Framnes Arena før ferien byrjar fredag. Av omsyn til smittevern vert avslutninga klassevis onsdag kveld, med jolemiddag og ulike aktivitetar. Voster er glad for at elevane ikkje går glipp av alle dei planlagde opplegga, og for at skulen kunne framskunda nokre av dei.
Når elevane kjem attende frå joleferie, er skulen førebudd på undervisning på raudt nivå.
— Me skal ha nok klasserom til å gjennomføra undervisning. Det skal ikkje vera noko problem med raudt eller gult nivå. Me er førebudde, seier rektoren.
Utfordringa vil derimot dukka opp dersom det vert nedstenging.
— Elevane har nok å dragsa på, om ikkje dei lyt ha med seg ein haug med bøker i tillegg. Her lyt lærarar tenkja saman med elevane og finna ut kva dei treng å ta med seg heim, seier Voster.
Rektoren er førebudd på at ein del av romjola eller starten på nyåret kan gå med til planlegging og organisering om smitteverntiltaka vert endra før skulestart.
