– Framleis veldig billeg

Brotne lovnader vart eit sentralt punkt i formannskapsdiskusjonen 14. juni om auken i den kommunale ytinga til Hardangerbadet gjennom tilskot til Kvammabadet KF.

Eit stort fleirtal vil som rådmannen auka henne frå 1 til 3,1 millionar kroner i året i år og neste år – fram til ein ny drifts- og samarbeidsavtale kjem på plass. I tillegg vil partia hjelpa til med å dekkja underskotet frå i fjor ved å løyva 2,1 millionar kroner.

Vil sjå drifta an

Frp, derimot, vil ikkje auka det årlege tilskotet før den ordinære tinginga om avtalen hausten 2024. Partiet vil i fyrste omgang berre hjelpa til med ei ny dekning av underskot, no for 2022. Frp vil yta éin million ekstra kommunale kroner, på vilkår av at Hardangerbadet Eigedom AS og kausjonistane bidreg med like mykje kvar.

Varaordførar Frode Nygård (Frp) la vekt på utsegner frå styreleiaren i Hardangerbadet i starten av pandemien om at badet skal klara seg sjølv når situasjonen har normalisert seg att. Frp meiner dessutan at innbyggjarane ikkje bør gjera opp for kausjonistar som har forplikta seg til å dekkja underskot med inntil éin million kroner årleg i ti år. Framlegget frå rådmannen og fleirtalet kan innebera at kausjonistane truleg slepp det i alle fall i år og kanskje også i 2024, avhengig av lønsemda i drifta.

– Det ligg føre ein avtale, sa Nygård.

Svein Johannes Stuve (Sp) meiner at sjølv etter auken vil Kvam herad framleis ha eit veldig billeg anlegg med tanke på kva alternativa kunne ha kosta. Han påpeika i tillegg at anlegget er fantastisk og gjev positive ringverknader.

– Eg er ikkje usamd i ein del av argumentasjonen om flott anlegg og alt det der, men det er ikkje det saka dreiar seg om, svara Nygård.

Han meiner ein bør venta til femårsavtalen skal forhandlast om neste haust for å få betre grunnlag for å vurdera føresetnadene for drifta.

– Eg kjenner godt til avtalen. Det er slik at den såkalla strukturinnsparingssummen var vesentleg for låg. Det har vist seg. Då er det litt feil å venta i to år med å ta grep. Det er rett og rimeleg å bruka midlane som trengst for å betala for dei tenestene me får, sa Stuve, som meiner den stadige diskusjonen om underskot gjev badet dårleg omdøme.

– Me står her me står

Ordførar Torgeir Næss (Ap) meiner at auken i tilskot utan tvil inneber eit vesentleg avvik frå avtalen med Hardangerbadet. Han er heller ikkje utan vidare samd med Stuve i at anlegget no vert «veldig billeg», men legg vekt på dei gode fylgjene av satsinga.

– Me står her me står. Me lyt løysa utfordringane me står i no. Me gjev badet og samfunnet ro og handlingsrom til å satsa i staden for å driva frå hand til munn og frå dag til dag, sa han.

Lisbeth Fredheim Oma (KrF) minte om at rammer har vore utvida i andre saker, og at fylgjene av ikkje å auka tilskotet kan vera svært alvorlege. Ho vonar at det vert mogeleg å utvida skulesyminga og slik bruka badetilbodet meir.

Heradsstyret avgjer saka i møtet 19.–20. juni.