– Framdriftsplanen er i strammaste laget

Det var i ein e-post i byrjinga av oktober at Bård Sandven, prosjekt- og byggjeleiar i Fuglafjell AS, bad byggherre Kvam herad om ei fristforlenging i prosjektet. Sluttdatoen – som i kontrakten er 31. januar 2023 – er ynskt forlenga med 40 dagar. Grunngjevinga er force majeure.

Force majeure er ein klausul som er vanleg å ha i kontraktar. Klausulen løyser ein eller begge partar frå ansvar om noko ekstraordinært som er utanfor partane sin kontroll, og som ingen kunne ha føresett skulle oppstå, skjer. Som ein krig, til dømes.

I e-posten skriv Sandven at det er, og har vore, ein utfordrande situasjon med unormalt lange leveringstider og seinka leveringar på ei mengd varer innan dei fleste faga i prosjektet. Det har dessutan vore vanskeleg å få tak i innleigd arbeidskraft, og det ser ikkje ut til at ting betrar seg med det fyrste.

Enkelte varer som er bestilte, har framleis uviss leveringsdato, ifylgje Sandven.

Varsla ikkje om varsel

Fristforlenginga vart teken opp i eit byggjemøte 13. oktober. I referatet kjem det fram at Kvam herad avviste grunngjevinga til Fuglafjell. Heradet meinte at varslinga skulle ha vore send med det same krigen braut ut.

Seinare viste det seg at Fuglafjell hadde sendt eit generelt varsel til dåverande prosjektleiar Bjarte Rasmussen 18. mars i år, men brevet har ikkje vorte arkivert. Rasmussen var leigd inn frå ABO Plan & Arkitektur AS. Ifylgje byggjekontrakten skulle brevet vore sendt til det kommunale postmottaket. Beskjeden er heller ikkje referert til i andre dokument.

Kvam herad forlanga likevel ei grundigare grunngjeving frå Fuglafjell.

I eit møte 20. oktober fekk heradet ei munnleg orientering om bakgrunnen for varselet. Fuglafjell informerte om både mannskapsmangel og om vanskar med leveranse av utstyr og byggjematerialar. Det har vore utfordringar med å få på plass mellom anna sirkulasjonspumper, gipsplater og baderomsplater.

Treng 40 dagar til

I eit brev til heradet skriv Sandven at framdriftsstyringa har vore dynamisk gjennom heile byggjetida, og at det heile vegen har vorte gjort tiltak og tilpassingar knytte til seinka vareleveransar. Det har ein i stor grad har lukkast med, skriv han. Verksemda står likevel att med ein del dagar som påverkar planen.

– Me klarer ikkje å forsera eller henta inn att alle desse dagane, og difor er det også påkravd med ei forlenging av byggjetida, skriv Sandven.

Fuglafjell har føreslege ei delovertaking av prosjektet for å redusera byggherren sine ulemper med utsetjinga.

Ekstra utgifter

Akkurat no ligg bygginga for så vidt godt an, opplyser Gisle Gravdal i avdelinga for forvalting, drift og vedlikehald av bygg i Kvam herad. I desse dagar vert det mellom anna lagt golvbelegg og måla vegger. Sjølve «råbygget» er nesten ferdig.

– Kva vil ei utsetjing ha å seia for Kvam?

– Eventuelt at ein får ekstra renteutgifter. Eg har ikkje rekna på det, men det kan fort verta nokre tusen for dagen, seier Gravdal.

Forslaget seier at innvendige arbeid kan overtakast 14. februar. Tekniske installasjonar vil ikkje vera ferdigstilte, men møblering og montering av byggherren sitt utstyr kan gjennomførast samtidig som teknisk arbeid går føre seg, meiner Fuglafjell.

10. mars er truleg eit bruksløyve på plass, og bygget kan takast i bruk. Utvendige areal og komplett bygg er venta klart til overtaking 28. mars.

Kva Kvam herad vil svara på forslaget om delovertaking, er førebels uvisst.