Frå parkering til uteområde
Skissene til utomhusplanen ved rådhuset og skulen i Norheimsund viser fleire parkeringsplassar enn det er i dag. Men er det nok?
– Eg ser me får ein del auke i parkeringsplassar, men om ein tel talet på bilar som er i området, er ikkje dette på langt nær nok.
Det sa Frode Nygård (Frp) då Heidi E. Ørjansen, leiar for eining for plan og byggjesak i Kvam herad, viste fram skissene til formannskapet 1. februar.
Ørjansen fortalde då at det også finst skisser av eit parkeringshus på to nivå på oppsida av Spar som kan vera interessant. Kvam herad er grunneigar der delar av anlegget eventuelt vil vera. Resten er eigd av Geirmund Storaas. Ei sak skulle koma i neste møte der meir detaljar og kostnaden skulle vera på plass, opplyste Ørjansen.
Vil løyva fem millionar
Slik vart det ikkje. Ifylgje sakspapira til formannskapsmøtet 22. mars trengst meir arbeid med utomhusplanen rundt rådhuset, som mellom anna handlar om å sjå på moglegheita for fleire parkeringsplassar.
Grunnen til at det hastar meir å få på plass eit vedtak om uteområdet til barneskulen, er løyvinga frå fylkeskommunen til Haugamyr-prosjektet. Heradet treng eit prosjekteringsgrunnlag som kan nyttast som anbodsgrunnlag.
Prisen for uteområdet ved skulen er stipulert til 5,1 millionar kroner med moms. Prosjektet har fått tilskot, men manglar framleis kring 4,7 millionar kroner. Tilrådinga frå rådmannen er å løyva fem millionar kroner. Løyvinga vert eventuelt finansiert med kraftfondet som eit stadutviklingsprosjekt.
Frå parkering til leik
I skissene som vart viste i formannskapet 1. februar, er det vist ei rundkøyring framom rådhuset. Ho er endestopp for Grovagjelet, som går opp frå fylkesvegen. Gamle Sandvenveg er teikna inn som gang- og sykkelsti, og mot skulane er det eit gatetun.
Rundt rådhuset er det planlagt ein einvegskøyrd veg som fører til to større parkeringsplassar med 33 og 40 parkeringsplassar på baksida. Om ein ikkje tek heile prosjektet med det same, er den største plassen lettast å opparbeida. Der er terrengarbeidet mindre, opplyste Ørjansen.
Parkeringsplassen utanfor Kvam familie- og læringssenter er i skissene noko mindre enn dagens plass, og er delvis erstatta med leikeområde.
Prosjektkostnaden er stipulert til 9,1 millionar kroner utan moms. Det føreset at ein gjennomfører heile planen med det same. Om jobben vert delt opp, vil det verta noko dyrare, opplyste Ørjansen.
Rikeleg med sykkelplass
Ein anna løysing som vert vurdert, er å gjera Grovagjelet einvegskøyrt. Då må nedkøyringa eventuelt flyttast mot trafikkskulen og bygget Kassen i Sandvenvegen.
– Då kan me sjå på om det er moglegheiter for å leggja til rette for meir parkering langs den vegen. Det vil bety at me må flytta eller riva nokre bygg, sa Ørjansen.
Svein Johannes Stuve (Sp) etterlyste ein plan for sykkelparkering. Ørjansen viste til at fleire sykkelparkeringar er teikna inn ved skulen. Utanfor rådhuset er dagens sykkelparkeringar tekne med. Også i gatetunet mot skulane vil det vera mogleg å parkera.
Parkeringsplassane bak og rundt rådhuset er med få unntak offentlege. Tilsette ved rådhuset må ikkje rekna med å kunna parkera ved rådhuset, men at dei kan parkera sykkelen rett utanfor rådhuset bør vera eit stort poeng, sa Kari Mostad (MDG).
– Kva med andre skular?
Tilsette og elevar har fått påverka teikningane av området bak Norheimsund skule. Mellom anna har elevane ytra ynske om eit dissestativ på framsida og baksida, og trampolinar. Båe delar er tekne med i skissene.
Vegen mellom skulen og rådhuset vil vera asfaltert, men vert stengd med bom og har fleire opphøgingar.
Jostein Ljones (Sp) sa at han kan tenkja seg at det vert kika litt på uteområda ved alle skulane i Kvam.
– Dette ser veldig bra ut på mange måtar, men kva trengst i alle uteområda i skulane i kommunen? Det er ikkje alle som er godt tilrettelagde, sa Ljones.
