Frå industri til utleige

Det går fram av ein søknad om dispensasjon frå plan- og bygningslova og kommuneplanen. I planen er tomta landbruks-, natur- og friluftsområde.

Sivilarkitekt Ingvar Skogseth Raugstad i Raugstad Arkitektur AS har søkt på vegner av eigarane Tom Terje Flesjå og Siv Helen Flesjå. Dei ynskjer å ta bygningen i bruk til noko fornuftig.

Raugstad ynskjer å avklara eventuelle krav til tiltaket før det vert utarbeidd eit detaljprosjekt og ein søknad om rammeløyve.

Bygningen ligg på kanten av ein stor, opparbeidd kai. Eit gamalt hus på kaien med bustad, butikk og postkontor vart i 2019 erstatta med ein tomannsbustad. Ekteparet Flesjå eig også denne.

Dei har vore opptekne av å behalda kaien der fabrikken ligg som eit naturleg tilkomepunkt til sjøen for ålmenta. Kaien er vorten ein hyggjeleg stad å opphalda seg, men framleis ligg den gamle tøffelfabrikken att som eit stygt sår, skriv Raugstad.

Etter at produksjonen vart avslutta på 1990-talet, har fabrikkbygningen stått i forfall. Raugstad ynskjer å byggja i éin etasje. Det vil koma store vindaugo i nord. Kaien vil framleis vera open og tilgjengeleg for ålmenta. Kaifronten vil framleis ha god plass til båtar. Det kjem hindringar for korkje friluftsliv eller næring. Kaien vil verta ein betre stad å vera for alle, lovar arkitekten.

Gaute Torsnes Føyen er mellom dei fem naboane som er varsla, og han har innvendingar. Han meiner det allereie er for mykje trafikk og støy i området på grunn av den eksisterande tomannsbustaden, som vert leigd ut via Airbnb. Føyen meiner tiltaket vil forverra situasjonen.

Raugstad opplyser i kommentarane til nabomerknaden at det vanlegvis er frå to til fire gjester i kvar bueining. Nokre få gonger i året er det inntil ti gjester i den største eininga.

Fleire utleigeeiningar kan føra til meir støy, skriv Raugstad, men han trur likevel at det kan løysast.