Frå gamalt til nytt

Lagshelga på hjelpekorpshytta var av det rolege slaget målt i oppdrag. Det gjorde til at dei frivillige sundag kunne ferdigstilla eit etterlengta og nytt aksjonsrom på hytta.

– Det er her me sit og styrer det heile om det skjer noko, fortel Jone Valland Tveit frå den nye kontorstolen.

Både framom og bak han er nye dataskjermar, og ein tv-skjerm viser eit livekart over området.

Om det vert sett i verk ein leiteaksjon eller går eit snøskred, vert det aktuelle området delt i søkjeteigar, mannskap fordelt og neste steg planlagt, fortel Frank Jacobsen. Dei som rykkjer ut, tek med seg eit nettbrett med sporing, slik at aksjonsleiar til kvar tid kan sjå på kartet kvar alle er.

På pulten like bak aksjonsleiaren kan andre jobba med lagsoversikt.

– Det er det same om me får beskjed om ein skade i ei hytte. Då kan eg herfrå kommunisera med skuteren som reiser ut på samband, ha kontakt med dei som er i hytta og prikka ut i kartet kvar skuteren skal køyra, forklarar Jacobsen.

Ved sida av dei to arbeidspultane står ei seng. Det er senga til vaktleiaren. Ho vart montert same dagen HF var innom.

– Så må det litt hyller på plass, slik at det ikkje ligg og flyt her, seier Jacobsen.

– Eg vil ikkje seia at det ligg og flyt her?

– Nei, no er det så nytt. Men du skulle ha sett det gamle. Ringpermar og papir låg strødde, seier han og ler.

– Mykje trakking

Jacobsen har vore aktiv i hjelpekorpset sidan 2007, og har såleis gjort det same arbeidet med kart på pulten og veggane, blyant, samband og ei gamal datamaskin hjelpekorpset fekk av Lid Jarnindustri. Det var andre tider. Eit stort kart hang ute i gangen, men det er teke ned, fortel han. Det var for utdatert.

Arbeidet med det nye aksjonsrommet har halde på sidan i sommar. Fyrst reiv dugnadsgjengen rommet. Så vart mellom anna ein døropning flytta på for å frigjera plass før det skulle byggjast opp att.

– Korleis var rommet før?

– Det var ganske likt, men med eldre utstyr og meir kronglete. Det gjekk til dømes ei altandør ut frå rommet, så det var mykje trakking forbi og det vart fort skittent. No er rommet heilt stengt av, berre til bruk ved aksjon, seier Tveit.

Roleg – for nokon

Det einaste hjelpekorpset hadde merka seg den fyrste vakthelga, var to mindre skadar i Furedalen laurdag kveld. Med eit mannskap på fem vart det såleis tid til å fylgja rutinane med vedlikehald på hytte og utstyr.

– Me prøver å halda rutinen med å gå gjennom utstyret og ha litt oppfrisking. Alle lag skal gå gjennom pulken for å vita kvar alt er om noko skjer, fortel Tveit.

Det har nok vore ei stille helg for dei fleste korpsa på Kvamskogen, men sjølv har han hatt nok å gjera. Tveit jobbar til dagleg som røyrleggjar, og fekk fleire oppdrag gjennom arbeidsgjevaren. Fredag kveld heldt han på med å tina røyr til klokka 23, fortel han.

Då HF er innom sundag, er planen å samla inn pant frå dei ulike pantedunkane før avreise. Då er alt klart til sortering for det neste vaktlaget.

Panten er ei grei inntekt. Han dekkjer nesten driftsutgiftene, fortel Jacobsen.