Frå friminutt til ministermiddag
Denne veka får HF hjelp av 15 år gamle Tormod Kristian McCorkle i redaksjonen.
McCorkle går i 9. klasse på Kvam ungdomsskule, og skal ha arbeidsveka si i lokalavisa. 15-åringen skulle i utgangspunktet innom redaksjonen for å jobba i fjor vår. Den gongen sette sjukdom ein stoppar for innhoppet. No er han glad for at det klaffa.
Måndag fekk McCorkle fyrst vera med på eit møte hjå ordførar Torgeir Næss, og så eta lunsj med kommunal- og distriktsminister Sigbjørn Gjelsvik (Sp). Det høyrest gjerne grått ut for nokon, men McCorkle synest ikkje at politikk er kjedeleg.
Han og familien flytta frå London til Kvam for halvtanna år sidan. Då familien budde i England, var «Brexit» eit heitt tema og eit naturleg samtaleemne rundt bordet heime. Han trur den politiske interessa kan ha kome av det.
– Kva tenkjer du om arbeidet så langt?
– Det er kjekt å få vera med på intervjua og høyra det som vert sagt – om problem som lyt løysast og så vidare, seier McCorkle.
– Så vart det litt småprat og latter innimellom. Og det var god mat! legg journalistspira til.
