Fosse-arrangement får fire millionar av regjeringa
Regjeringa vil heidre nobelprisvinnar Jon Fosse med eit årleg litteraturarrangement i regi av Nasjonalbiblioteket, og løyver fire millionar til formålet.
– Jon Fosse har medverka til å løfte det norske litteraturfeltet internasjonalt. Regjeringa vil gjere sitt for at dette løftet blir halde ved lag i tiåra som ligg framfor oss, seier kultur- og likestillingsminister Lubna Jaffery (Ap) i ei pressemelding.
Arrangementet skal innebere ei Fosse-forelesing med eit tilhøyrande festarrangement. Det skal også tildelast eit stipend til ein omsetjar som ønskjer å omsetje norske bøker til andre språk under arrangementet.
Løyvinga er eit av fleire lokale og nasjonale kulturtiltak som får midlar i det reviderte nasjonalbudsjettet. Mellom anna får Det Norske Teatret eit ekstraordinært driftstilskot på ni millionar kroner
– Det Norske Teatret er ein av dei største og viktigaste scenekunstinstitusjonane våre og speler ei vesentleg rolle for å fremje nynorsk i samfunnet vårt. Vi veit at dei har hatt ein krevjande økonomisk situasjon, og eg er glad for at vi har funne ekstra midlar som sikrar gode rammer for framtidig drift, legg Jaffery til.
(©NTB)
