– Fortvilande situasjon
Tørvikbygd Båtlag må venta lenger på stønad til båthamna.
Båtlaget har søkt om halvannan million kroner frå det kommunale kraftfondet til den omstridde båthamna. Rådmannen rår ikkje til å støtta tiltaket enno, og meiner byggjesaka som går føre seg, bør avklarast fyrst.
– Eg håper eg får vera med og stemma for ei sak om bygdeutvikling i næraste framtid, sa Gjermund Stuve (Sp) då formannskapet drøfta saka 1. november.
Han synest det er trist at bygda er prega av hamnestriden, og vonar han snart roar seg.
Geir Madsen (SV) meiner situasjonen er fortvilande, og vonar saka kjem opp att når formalitetane er rydda av vegen.
Ifylgje søknaden er kostnaden med etableringa av båthamna nær ti millionar kroner. Medrekna er eit tap på vel 2,5 millionar kroner som fylgje av at lagmannsretten krev at hamna vert flytta, 100.000 kroner i form av dugnad knytt til flytting og 22.500 kroner til ansvarleg søkjar Alutec AS sitt arbeid med flyttinga. Etableringa av den opphavlege hamna kosta 7,3 millionar kroner. Kostnadene med dei to rettssakene om hamna er ikkje del av søknaden.
Formannskapet tilrådde samrøystes å avslå søknaden, som heradsstyret tek stilling til 7. november.
