Forsking for grønt lys
Fylkestinget vil bruka fem millionar på forsking som skal visa veg til vekst i oppdrettsnæringa i Vestland.
Bak budsjettvedtaket i fylkestinget i førre veke stod samarbeidspartia Ap, Sp, KrF, V, SV og MDG, med gruppeleiarane Sigrid Brattabø Handegard (Sp) og Trude Brosvik (KrF) som initiativtakarar.
Pengane skal «auka kunnskapen om påverknad på villaks og aure» i produksjonsområda 3 og 4 – PO3 og PO4. Kronene skal brukast i samarbeid med forskingsmiljø og oppdrettsnæringa. Det er ikkje spesifisert i vedtaket korleis dette skal gå føre seg i praksis, men hovudutval for næring skal arbeida vidare med saka.
Vestland er i det såkalla trafikklyssystemet plassert i raud sone, som i utgangspunktet inneber at produksjonen må reduserast med seks prosent annakvart år. Målet med vedtaket er å farge området grønt.
Partia viser til at Vestland får «relativt store midlar» frå havbruksfondet. Tanken er å nytta ein del av pengane til å utvikla næringa.
– Eit kunnskapsbasert grunnlag for situasjonen for villaks og sjøaure, og tiltak i næringa, er det viktig for oss å bidra til, seier Brosvik og Handegard i ei pressemelding.
Dei viser til at næringa er avhengig av at drifta stettar miljøkrava, handterer lakselusproblema og styrkjer omdømet sitt.
