Forskar på havbotn i samband med fiskeoppdrett

Båten har eit mannskap på 14 personar. Med fjernstyrte ubåtar kan forskarane sjå seg om på havbotnen og ta botnprøvar. Tina Kutti er forskar ved Havforskingsinstituttet og leiar oppdraget. På denne turen har forskarane hovudsakleg kikka etter bambuskorall.

— Me held på med undersøkingar for å sjå kva effekt oppdrettsnæringa har for bambuskorallen. Bambuskorallen finst berre i Noreg, seier Kutti.

I Hardangerfjorden er korallarten vanleg, men den lyt passast på, og ein lyt vera sikker på kor det eventuelt kan ankrast opp fiskeoppdrett. Medan menneskeleg aktivitet potensielt kan skada korallarten på eit par år, kan det ta hundre- eller tusenvis av år å få han tilbake.

— At arten vert så gamal, gjer det ekstra viktig at me har kontroll på han og ikkje påverkar han negativt, seier Kutti.

Oppdraget har forskarane fått frå Fiskeridirektoratet.

Onsdag dreg fartøyet vidare til Tysnes. Der skal forskarane bokstavleg tala plukka opp eit eksperiment. Korall vart senka i sjøen ikkje så langt frå eit oppdrettsanlegg for tre år sidan. No ventar forskarane spent på å sjå kva dei kan lesa ut av eksperimentet.

— Er 500 meter ein grei avstand, eller må me opp til 1.000 eller 2.000 meter? Det er spørsmål me lyt finna svar på, seier Kutti.