Fornyar museum for å opna for fleire

Ingebrigt Vik museum har søkt Kvam herad om stønad til utvikling og tilrettelegging av museet og parken, med vekt på tiltak som fremjar mangfald og inkludering.

Bakgrunnen er krav om universell utforming og eit ynske om betre arbeidsvilkår for omvisarane. I tillegg krev kunsten meir enn før for å verta sett og engasjera.

Meir handfast er planen ein ny inngang med enklare tilkome på baksida, med ein rampe og ei dør med elektrisk døropnar. Museet vonar at det kan medføra at museumsparken på baksida kan verta nytta meir som eit sosialt rom. Planane omfattar elles mellom anna nytt dekke av linoleum i museet, ny lyssetjing, nye møblar, skjerm- og videoutstyr, måling og opprusting av toalett.

Kostnad utan moms er på vel 800.000 kroner. Heradet vert bede om 84.800 kroner til den nye døra. Frå før har Norsk kulturråd løyvt 300.000 kroner. Museet sjølv vil yta 381.500 kroner pluss dugnadsarbeid.

Museet er del av Hardanger og Voss museum og vert drive av Kunsthuset Kabuso.