Formannskapet eser ut, men ikkje utan motstand
Allereie i andre sak i det ferske kommunestyret oppstod usemje då formannskapet i Ullensvang vart utvida frå 9 til 13 representantar.
Kommunestyret møttest onsdag morgon til konstituerande møte med ei røys med val og formalitetar. Då vart det altså raskt kjent at formannskapet vert utvida frå 9 til 13 representantar, etter framlegg frå Ap, H, INP, SV og KrF. Til gjengjeld vert utval for kultur og levekår redusert frå 15 til 13 representantar.
Ikkje overtydd
Ifylgje Vidar Solvi (Ap) er tanken med utvidinga å få eit «breiast mogeleg» formannskap. Lajla-Margrethe Lindskog-Lund (Sp) opplyser at grunngjevinga ho har fått frå fleirtalet, er eit ynske om betre kjønnsbalanse.
Den forklaringa kjøper ho ikkje utan vidare. Ho viste til at det nye kommunestyret rommar over 40 prosent kvinner, og at det ikkje burde vera noko problem å oppnå minst det same i alle fall i formannskapet. Ho påpeika at auken vil føra til auka kostnader.
– Me har gjort vårt ytste for å få til ei god liste. Me skjønar kva veg det går, men me synest ikkje noko om det, sa Lindskog-Lund.
Ho meiner utvidinga er til politisk gagn for fleirtalet, men ikkje for Sp. Ho var av den oppfatning at partia hadde ein avtale om færre representantar førre veke. Kontrameldinga kom fyrst fredag. Endringa medførte ein del meirarbeid, fortel ho til HF.
– Me måtte gjera om på ganske mykje. Det stokka om ganske mykje. Ein del varafolk måtte inn i utvala for å få kjønnsbalansen til å gå opp, seier ho.
I debatten viste ho til at fellesnemnda som arbeidde med kommunesamanslåinga før 2020, vedtok eit formannskap med 9 medlemer og utval med 11 medlemer. Det hadde Sp innstilt seg på. Framlegget frå partiet om å halda fram med 9 i formannskapet fekk støtte berre av R.
Val som venta
Roald Aga Haug (Ap) vart vald til ordførar med 19 mot 14 røyster. Inger Synnøve Vestrheim (H) vart varaordførar med like brei støtte.
Sp fremja Lajla-Margrethe Lindskog-Lund som ordførarkandidat, men ikkje uventa støtta berre R framlegget. R argumenterte mellom anna med at ein ordførar frå Jondal kan byggja bruer over dei gamle kommunegrensene, og at det kan gje eit signal om ei meir desentralisert politisk retning. Dessutan har det aldri vore ein kvinneleg ordførar i Odda, berre i Ullensvang og Jondal, påpeika Lisa Karine Haugland (R).
– Sp var valets vinnar. Mange i folket ynskte ei endring. Det er rett å ta det no, proklamerte Jørund Kvestad (Sp).
R fremja Terje Kollbotn (R) som varaordførarkandidat. Partiet framstilte han som ein svært røynd politisk bauta. Også Kollbotn fekk støtte av berre Sp og R, i samsvar med den valtekniske avtalen mellom partia.
Lærerik start
Jondal er representert av tre representantar dei neste fire åra. To av dei – Lajla-Magrethe Lindskog Lund og Elin Eide Brattabø (H) – er røynde. Den siste, Eirunn Lothe Midtun (Ap), er heilt fersk, men har fått plass i formannskapet og har sete i forhandlingsutvalet til partiet saman med Roald Aga Haug (Ap) og Trygve Bolstad (Ap).
– Travelt. Det har vore mykje møte og planlegging. Det er ein stor kabal som skal gå opp. Eg har vore mest med for å læra, seier Midtun om vekene etter at ho vart vald 11. september.
Ho seier det har vore spanande, kjekt og ei positiv oppleving å få sjå korleis ting går føre seg.
– Kva har du lært?
– Det er mykje folk involvert. Alle har meiningar, så ein må finna løysingar som fungerer for alle. Det vert ikkje alltid slik ein har tenkt sjølv. Me har inngått eit valteknisk kompaniskap med parti som er mindre enn oss, men dei må få noko dei skal ha sagt. Me kan ikkje slå i bordet med kor store me er.
Ho reknar med at det vil oppstå usemje i enkeltsaker, men påpeikar at alle partia i grove trekk er samde om mykje. Store endringar frå førre valperiode reknar ho ikkje med.
– Me ynskjer jo det same. Så er det små enkeltsaker og skilnader til dømes i budsjettet, seier ho.
– Må gå vidare
Også Lindskog-Lund har hatt det hektisk med å leggja kabal etter valet. Kjønn, geografi, alder, røynsle og kompetanse må vurderast når folk skal plasserast i roller. Dessutan må alle spørjast fyrst.
– Det er ein del av det har sagt ja til, så dette må me gjera, konstaterer ho.
Lindskog-Lund og Terje Kollbotn (R) offentleggjorde førre veke at dei har inngått eit valteknisk samarbeid, med mål om også politisk samarbeid i saker dei er samde om. Samarbeidet sikra partia til saman fire av ni lemer i formannskapet. Likevel reknar ho med mykje sak-til-sak-politikk denne perioden, ikkje minst sidan det ikkje er laga ei politisk plattform i nokon leir.
– Kan du seia litt om bakgrunnen for samarbeidet?
– Me blei ikkje inviterte til andre samtalar. Det var klart og tydeleg. Då var det naturleg for oss å snakka med dei som stod att. Det var berre to parti, sa han.
Valkvelden fekk Sp vita både at partiet var størst, men også at Ap stakk av med ordførarvervet. Det var ein aftan med temmeleg blanda kjensler, vedgår ho.
– Korleis ligg det til rette for samarbeid i kommunestyret no?
– Det var kjipt der og då. Eg har vorte spurd om eg er sint. Eg er ikkje det, og var berre skuffa der og då. Eg tapa den kampen, men må gå vidare og kan ikkje dvela ved det. Då kan eg ikkje vera politikar, om eg grev meg ned i alle tap. Det nyttar ikkje, seier ho.
Lindskog-Lund lovar eit tydeleg mindretal som skal arbeida knallhardt for å få gjennomslag.
– I og med at ingen har ei politisk plattform, kan det verta enklare i denne perioden enn det var i førre. Eg håpar jo det, seier ho.
HF gjer merksam på at Eirunn Lothe Midtun er kusina til skribenten. Red.
