Førjulshyggje i Vikøy

– Eg ser føre meg at dette kan verta ein ny juletradisjon, seier Tone Solvang.

Ho er styremedlem i Vikøy Bygdekvinnelag, som var arrangør. Det vart ikkje noko av arrangementet i fjor, men for to år sidan vart «Jul i Borgstova» arrangert for fyrste gong. Solvang fortel at tanken er å skapa ein møteplass for dei som bur i Vikøy.

– Me har ingen butikk eller andre naturlege møteplassar, så me prøver å laga til noko slik at me som bur i bygda, kan treffa kvarandre, seier Solvang.

– Skal henga på juletreet

Inne i prestegarden var det skipa til juleverkstad. Her var det små stoffhjarte, perler, glansbilete og papir, slik at borna kunne laga eigen julepynt. Det var mogleg å laga ei lykt til telys ved å smørja eit glas med egg innvendig og strø på sukker.

Anne Neteland sat ved enden av langbordet, og hadde funne seg to små filthjarte.

– Når eg har sydd dei saman, skal eg ta det med meg heim og hengja det på juletreet, seier sjuåringen.

Ho bur ikkje i Vikøy, men tok turen saman med mamma Kari Tveitarås og den tre år gamle steveslesystera Johanna Haugsland Hamre.

– Det er eit koseleg arrangement og veldig kjekt å vera her, seier Tveitarås.

– Kom som bestilt

Bygdekvinnelaget har skipa til andre sosiale tilstellingar før, mellom anna jonsokfeiring, bytedag og kyrkjekaffi. I tillegg har laget hatt lågterskeltilbodet «tur der me bur», der dei lokale treffest, går ein tur og et kveldsmat.

Lene Storstad gjekk rundt juletreet saman med dottera Othelie Storstad Rubin.

– Det er veldig hyggjeleg å vera her. Snøen kom som bestilt, så no kom eg i julestemning, seier Storstad.

Storstad er også med i bygdekvinnelaget, og synest at arrangementet er akkurat passe nedpå.

– Me som arrangerer, er travle med små born, så det er godt med eit arrangement som ikkje krev så mykje. Det er ikkje for mykje opplegg og stress, seier ho.

Sjå fleire bilete her:

Her kan du sjå og høyra korleis jula vart ynskt velkomen: