Føretrekkjer fastbuande
Hus- og hytteprosjektet på Omastrand vil krympa verdien av nærliggjande hus og eigedomar.
Det skriv Anne Christine Viken til Archihus AS, som arbeider med reguleringsplanen vest for Gjerdaneset. Viken er næraste nabo til området som er under planlegging.
Stor aktivitet vil uroa, mellom anna med lyd, meiner ho. Utsikta og innsynet vil verta svært endra og vera til stor sjenanse, ottast ho.
Viken føretrekkjer fastbuande om ho skal velja naboar. Dei vil bidra til folketalet og skatteinntektene til heradet. Sjølv om hyttefolk gjev auka omsetning på butikken, trur ho at fastbuande som er tilsette ved til dømes Fjellstrand, vil gje meir stabil inntekt.
Eit stort hyttefelt kan verta utfordrande på fleire måtar, trur naboen. Er det nok vatn til alle? spør ho.
Å laga veg til båthamna vert eit stort inngrep i naturen og kan aldri førast tilbake, åtvarar Viken. Ho føreslår at ein heller utvidar eksisterande båthamner.
