Føreslår tryggingstiltak i Ålvik
Køyretøy ved barnehagen i Ålvik held høg fart. Fartshumpar vil redusera faren, meiner samarbeidsutvalet.
Det går fram av eit av mange punkt i innspelet til den kommunale trafikksikringsplanen. Mellom dei andre punkta er fylgjande:
• Det manglar sikring frå garasjane til brua ved Folkets Hus og til brua ved Elvely, og i ei skråning ved Storhaug.
• Ved botnen av Brattbakken er det eit uoversiktleg, farleg kryss. Barnehagen og mange skuleborn brukar vegen. Ein spegel eller fjerning av ein hekk vil redusera faren.
• Nedover Kleivet er det ein svært låg murkant. Mange born nyttar vegen til og frå skulen, og han vert brukt som turveg.
• Ved busstoppet ved Sjukestova og ved Tyrvefjøra manglar fotgjengarovergang.
• Den smale brua ved Folkets Hus skapar konfliktar og forvirring mellom køyretøy og mjuke trafikantar.
• Ein del av strekkja Ålvik—Vikedal og strekkja Torget–Skjeret manglar gang- og sykkelveg. Barnehagen brukar ikkje strekningane i dag på grunn av av tryggleiksomsyn.
