Føreslår stønad til enøktiltak
Amund Velure (Ap) ynskjer at Ullensvang kommune støttar dei som vil skaffa seg varmepumpe.
Det skriv han i eit spørsmål til ordføraren som vert teke opp i kommunestyremøtet 7. september. Velure vonar ordføraren vil ta tak i saka.
Straumprisane har vore høge. Nett no er dei låge, men det er all grunn til å tru at dei om nokre få månader vil skyta i vêret att, meiner Velure. Mange innbyggjarar kvir seg til dei igjen får høge straumrekningar, påpeikar han.
Mange nabokommunar har alt innført slik stønad, til dømes Bergen, Eidfjord, Kvam og Suldal.
Slik den økonomiske situasjonen i Ullensvang kommune er, meiner Velure at ein bør ha ei sjenerøs ordning: Ein bør støtta kjøp av ny varmepumpe med 15.000 kroner eller maksimalt 50 prosent av kostnadene. Gamle varmepumper brukar svært mykje straum, så dei som vil byta ut gamle varmepumper, bør få 10.000 kroner i stønad, meiner Ap-politikaren.
I fyrste omgang bør det ikkje vera nokon frist for å søkja, meiner Velure. I fleire av nabokommunane har fristen gått ut, så dei kan ein spørja om kor mange som har søkt, så ein kan budsjettera kostnader.
