Føreslår prisprofil for kommunale basseng
Gudmund Toreid i Jondal Idrettslag meiner det bør verta billegare å bada for å få fleire i vatnet. Kommunen arbeider med å fremja ei sak om temaet.
Lagsleiaren er oppteken av prisprofilen i dei kommunale bassenga i heile Ullensvang kommune, og har teke denne opp i eit eige brev til kommunen. Toreid trur at lågare prisar og sal av sesongkort til alle basseng kan bidra til at kommunen når ambisiøse mål i temaplanen for fysisk aktivitet, idrett og friluftsliv.
– Folk flest er for lite aktive. Å få fleire til å verta storbrukarar av bassenga vil vera eit godt bidrag til betre folkehelse i kommunen vår – til ein svært låg kostnad, skriv Toreid.
Han påpeikar at billettinntekter uansett vil utgjera ein forsvinnande liten del av kostnaden med å halda bassenga opne. Set ein dei ned, kan fleire koma til å løysa billett. Det beste grepet er å få mange til å kjøpa sesongkort i staden av badesesongen, sidan kjøparane gjerne vil ha mest mogeleg valuta for pengane, trur han. I dag kan ein berre kjøpa sesongkort i Jondal.
Set ned prisane
Etter hans syn bør prisane differensierast etter kva badetilbod bygdene har. Hans framlegg inneber at familiesesongkortet i Jondal går ned frå 1.100 til 1.000 kroner, medan prisen i Folkebadet i Odda vert 1.400 kroner sidan bassenget er mykje lenger ope. Einskildbilletten for vaksne kostar 70 kroner, mot dagens 80, og born under skulealder får sleppa gratis inn.
I Røldal, Skare, Hauso og Kinsarvik, som har mindre basseng, er framlegget lågare prisar. Etter hans syn kan jondalsmodellen, der idrettslaget får kompensasjon for å yta badevakter, prøvast andre stader. Ordninga føreset god rekruttering av badevakter frå starten og gode rutinar for sertifisering i samarbeid med skulen, påpeikar Toreid.
– Den viktigaste vinsten ved å ha ein del lokale, frivillige badevakter er at ein får ei gruppe symje- og badeinteresserte som får eit eigartilhøve til bassenget og bidreg til å skapa eit triveleg miljø, skriv leiaren i idrettslaget.
Usikkert når
Han har fått tilbakemelding om innspelet frå kommunalsjef for kultur, næring og samfunn, Kristian Bondhus-Jensen. Han slår fast at innspelet er nyttig og i stor grad i samsvar med vurderingane i administrasjonen.
Kommunalsjefen kan ikkje lova når det kjem eit samla opplegga for alle basseng, noko som må fremjast politisk.
– Det er mange partar og ein del ulike problemstillingar, men me vil halda fokus på det vidare utover hausten, skriv Bondhus-Jensen.
