Føreslår nye millionar til museumssatsing
Hardanger og Voss museum kan ta ein ny jafs av kraftfondet.
Prosjektet «Tett på» er tidlegare tildelt 10,9 millionar kroner frå Kvam herad. No rår rådmannen politikarane til å løyva 4,5 millionar til. Søknaden lydde på 8 millionar.
Avstyttinga er grunngjeven med den brått tronge økonomiske situasjonen til Kvam herad, pluss at det er avgrensa med pengar i fondet. Årleg vert det tilført 4,7 millionar kroner. Dessutan seier føringane for kraftfondet at det ikkje bør nyttast til å støtta søkjarar som får store overføringar over statsbudsjettet.
Pengane skal gå til arbeidet med bygget Kulturnaustet, som er sett i gang. Det har ei kostnadsramme på vel 96 millionar kroner, og Hardanger fartøyvernsenter hadde for ei tid sidan skaffa nær 74 millionar.
Rådmannen er samd med søkjaren i at satsinga vil gagna fleire enn berre senteret. Det vil styrkja attraktiviteten, reiselivet og samfunnsutviklinga
Formannskapslemene får saka på bordet 22. november, fem dagar etter at sakspapira vart tilgjengelege. Heradsstyret avgjer saka 8. desember.
