Føreslår ny fartsgrense i Grova
Fylkesveg 49 gjennom Norheimsund sentrum bør få 40-grense.
Det skriv Statens vegvesen i eit brev til Vestland fylkeskommune, som svar på ei innstilling om særskild fartsgrense på 30 kilometer i timen på vegen. Vegen har i dag 50-grense.
Med dagens tilhøve vil det vera meir naturleg med 40-grense dersom fartsgrensa på strekninga skal senkast, meiner vegvesenet. Med senka fartsgrense kan det verta trong for eit tydelegare skilje mellom mjuke trafikantar og parkeringsareal på heile strekninga, og fleire fartsdempande tiltak.
Strekkja har mellom anna langsgåande parkeringsplassar, gangfelt og butikkar som gjev utfordringar med arealbruken, skriv fylkeskommunen. Nokre av dei eksisterande parkeringsregulerande og stansregulerande skilta burde etter vegstellet sitt syn vore reviderte, då dei er plasserte slik at reguleringa ikkje er synleg, er uklar eller overflødig.
Ifylgje etaten kunne nokre eksisterande markeringsskilt på strekninga vore fjerna, då skilta kan vera til hinder for ferdsle.
Vegvesenet har bede om eit møte med fylkeskommunen om saka denne månaden.
